Pagina Inicial»Noticia
Presidente Parlamento Nacional, Aniceto Longuinhos Guterres Lopes, acompanha hussi Deputado balun, halo abertura ba Campanha 16 Dias Ativismo Hapara Violência Hassoru Feto No Labarik Feto ho tema Mai Ita Hamutuk Hatete Lae Ba Assedio Sexual No Violência Sexual, ne’ebe realiza iha loron 26 fulan novembro tinan 2020, iha Posto Administrativo Atsabe, Município Ermera.
Iha discurso abertura, Presidente Parlamento Nacional hatete atu combate violência hassoru feto no labarik feto, precisa ema hotu nia contribuição, no campanha de’it la'ós solução único maibé tem que haree ba abut ne’ebe causa ba violência hassoru feto no labarik feto.
Iha Constituição da República Democrática de Timor-Leste, artigo 17º regula kona-ba Igualdade ba Feto no Mane, ne’ebe feto ho mane iha direito no obrigação hanessan iha moris família, cultural, social, económico no política nia laran.
Nune’e mós iha tinan 2003, Timor-Leste ratifica Convenção hodi Elimina Forma Oioin Discriminação hassoru Feto (CEDAW-sigla inglês) ho objetivo atu hapara violência baseia ba género iha Timor-Leste, nu’udar base ba implementação no compromisso internacional.
Governo mós aprova Resolução Governo n.o 25/2017 de 17 de maio kona-ba plano ação nacional contra violência baseia ba género.
Tanba ne’e hussu ba organização hotu-hotu atu apoia Governo hodi elimina violência hassoru feto no labarik feto iha futuro.
Presidente Parlamento Nacional acrescenta katak ho esforço sira ne’e, Timor-Leste tem que sai fatin seguro ba feto no labarik feto sira.
Presidente da Autoridade do Município de Ermera, José Martinho dos Santos Soares, hatete tuir dados estatística, violência iha Município Ermera sei aas compara ho município sira seluk, tanba ba oin precisa iha cooperação no comunicação serviço entre instituição no organização competente sira hodi minimiza no hapara violência hassoru feto no labarik feto sira.
Iha atividade ne’ebé ho presença estudante sira, autoridade local no convidado sira seluk ne’e, iha mós apresentação matéria hussi Organização Sociedade Civil sira hanessan Alfela, Hakbit no Policia VPU Município Ermera.
