Pagina Inicial»Noticia
Parlamento Nacional liu hussi Assessora Comunicação ba Gabinete Presidente Parlamento Nacional hamutuk ho Centro de formação Parlamentar, organiza formação jornalismo ba Media Officer Parlamento Nacional, durante loron tolu, 24 to’o 26 fulan novembro tinan 2020, iha Salão Conferência Residência Oficial Presidente Parlamento Nacional iha Farol-Díli.
Formação ne’e rassik ho objetivo atu hakle’an liu tan conhecimento funcionário sira nian iha parte media no comunicação atu nune’e bele sai profissional liu tan iha desempenho serviço loroloron nian.
Facilitador sira mai hussi Centro Formação Técnica em Comunicação (CEFTEC) mak hanessan, Sr. Laurinão P. Barreto, apresenta matéria sira mak hanessan, conceito comunicação semiótica, organiza encontro no organiza conferência imprensa; Sr. Paulino Kintas, apresenta Matéria sira mak hanessan: Método hakerek imprensa no produção notícia radio; Sr. Martinho Tavares, apresenta matéria kona-ba: Feature televisão no radio; Josefino Babo, apresenta matéria kona-ba operação Camera no Sr. Marcelino Monteiro, apresenta matéria sira kona-ba edição vídeo utilização software adobe audition CS6.
Secretária-Geral (SG) Parlamento Nacional, Adelino Afonso de Jesus, halo encerramento ba formação ne’e, hodi hatete, formação jornalismo ba media officer sira ne’e importante, atu aumenta liután sira nia conhecimento iha serviço relaciona ho comunicação social nian. Secretário-Geral mos deseja atu formação hanessan sei bele coloca tan iha plano ba tinan sira oin mai. ikus liu, SG mos agradece ba facilitadores hussi CEFTEC tanba disponível hodi fahe conhecimento ba funcionário sira Parlamento Nacional nian.
Iha encerramento ne’e mos, representa facilitador CEFTEC, Sr. Laurinão hatete, formação durante loron tolu nian iha matérias oioin, mas tempo la suficiente atu aprofunda. Ho nune’e, formador ne’e sugere atu formação iha futuro precisa planeada ba tempo barak. Formador ne’e mos agradece ba fiar ne’ebé mak Parlamento fó ba CEFTEC hanessan formadores ba formação ne’e.
Formando sira mai hussi media officer Bancada Parlamentar sira, pessoal apoio ba Mesa Parlamento Nacional, funcionário sira hussi Divisão Rádio no Televisão Parlamento Nacional (RTPN) no mos hussi Divisão de relações Públicas, Comunicação e Educação Cívica (DIRPEC).
Ikus hussi formação ne’e, formando sira simu certificado de reconhecimento hussi Parlamento Nacional.
Formação ne’e rassik hetan abertura hussi Secretária-geral cessante, Cedelizia Faria dos Santos, iha inicio loron formação nian 24 fulan novembro tinan 2020.
