Grupo das Mulheres Parlamentares de Timor-Leste (GMPTL), halo colaboração ho autoridade municipal Manatuto nian, organiza campanha 16 dias ativismo hapara violência hassoru feto no labarik feto ho tema ‘’Mai Ita Hamutuk Hatete Lae ba Assédio Sexual no Violência Sexual!’’, iha Manatuto, iha loron 26 fulan novembro tinan 2020.
Seminário ida ne’e ho nia subtema ‘’Timor-Leste ’Timor-Leste tem que Sai Fatin Seguro ba Feto no Labarik Feto!” hetan abertura oficial hussi Vice-Presidente Parlamento Nacional, Deputada Maria Angelina Lopes Sarmento. Iha discurso Vice-Presidente nian, hatete, objetivo essencial hussi Campanha ida ne’e mak atu fahe informação no sensibilização kona-ba hapara violência hasoru feto no labarik feto. Luta contra qualquer tipo violência contra feto no labarik feto iha Timor-Leste sai hanesan compromisso ida Estado no Parlamento Nacional nian. Além de ne’e, GMPTL nuudar lian feto iha Parlamento Nacional ba implementação Convenção hodi elimina forma descriminação oi-oin hasoru feto, liu hossi atividade sira ne’e.
Orador sira ba seminário, ne’ebé ho nia duração loron ida mak hanesan Inspetor-Chefe hussi Unidade Pessoas Vulneráveis no representante hussi Polícia Nacional de Timor-Leste, ho tema “Oinsá atuação ba violência baseia ba Género’”, ho moderador maka Presidente GMPTL, Deputada Lidia Norberta dos Santos Martins.
Marca presença iha cerimónia maka, Vice-Presidente Parlamento Nacional, Deputada Maria Angelina Lopes Sarmento, Presidente do GMPTL, Deputada Lídia Norberta dos Santos Martins, Deputada Regina Freitas, Deputada Josefa Alvarez Pereira Soares, Deputada Maria Angelica D. C. dos Reis, Deputada Olinda Guterres e Deputada Fernanda Caldeira, acompanha mos ho Secretário Administrador Município Manatuto, Agrepino da Silva S. R. Costa, Segundo Comandante Polícia Nacional Timor-Leste, Insp. Domingos G. Soares no Administrador do Posto Laclubar, Natalino Martins Carvalho. Além de ne’e, participa mos hussi autoridade local sira, Diretor sira hussi linhas ministeriais, Padre Paróquia Laclubar, Professor sira no população sira hussi Posto Administrativo Laclubar.
Depois do seminário, delegação continua halo visita ba uma mahon ba paciente Saúde Mental sira iha Laclubar, hodi hare direita condição serviço funcionário sira nian no mos infraestrutura iha fatin refere.
