Tinan 45 ona, ita hanoin hikas nu’udar Estado, facto histórico ida-ne’ebe transforma estatuto politico Timor-Leste ba país independente ida iha mundo. Facto histórico ne’ebe nakonu ho desafios politico no ideológico ne’ebe lori Timor-Leste ba hassoru intervenção oioin iha processo materialização independência nacional. Iha todan hirak ne’e nia okos povo la lakon nia convicção, vontade politica, criatividade no capacidade hodi buka solução no supera situação difícil iha tempo ne’ebá.
Auto convicção no vontade politica ne’ebe povo constrói iha situação difícil hahoris continuidade liderança no reorganização luta ne’ebe culmina ho reafirmação vontade politica popular ba independência nacional iha 30 Agosto 1999, no restaura iha 20 de maio 2002. Ponto culminante paralelo rua ne’ebe forma relacionamento triangular ho 28 Novembro 1975 ne’ebe harii no reforça Independência Timor-Leste nu’udar Estado de Direito Democrático, no marca historia no lição politica no diplomática Timor-Leste nian iha convivência regional no internacional.
Cada era iha desafios rassik iha percurso político no iha construção no reconstrução Estado. Ita comemora proclamação independência iha ambiente 18 anos restauração independência, liuliu ho situação atual, ho desafio boot ida: hamoris valores, halibur no hatuur hikas lição politica ne’ebe lori Timor-Leste manán obstáculos oioin iha passado, hodi ita bele sustenta di’ak liu tan funcionamento Estado de Direito Democrático.
Nu’udar presidente Parlamento Nacional, ha’u hakarak convida cidadão hotu, autoridades comunitários, autoridades posto administrativo, municípios too nacional, sociedade civil, setor privado, confissões religiosas, instituições educativas atu halo reflexão genuína ho honesto ba processo hirak ne’e hotu, hamoris valores iha relacionamento social, politico, humano iha nível hotu-hotu hodi lori Timor-Leste ba prosperidade.
Parabéns ba povo Timor-Leste tomak.
