Presidente Parlamento Nacional, Aniceto Longuinhos Guterres Lopes, halo reunião ho Ministra dos Negócios Estrangeiros e Cooperação, Sra. Adaljiza Albertina Xavier Reis Magno ho nia equipa, iha loron 18 fulan novembro tinan 2020, iha Sala Gabinete Presidente Parlamento Nacional nian.
Depois de encontro, Ministra informa ba jornalista sira katak, objetivo hussi reunião ne’e atu halo briefing kona-ba processo tomak adesão Timor-Leste ba ASEAN nian, hodi nune, Presidente Parlamento Nacional bele iha conhecimento ba processo preparação Timor-Leste nian hodi sai membro ASEAN.
Além de ne’e, informa mos kona-ba processo preparação técnica nian quase hotu ona, no iha loron 7 ou 9 fulan dezembro 2020, sei halo hotu processo preparação iha pilar socioeconómico nian, no hodi hein implementa ba feedback hussi secretariado ASEAN nian.
Ministra ne’e mos acrescenta liu tan katak, Timor-Leste halo hotu ona avaliação ba pilar rua, maka pilar politico ba segurança nian hotu ona iha tinan kotuk, no pilar sociocultural nian ne’ebé sei hotu iha tinan ida ne’e. Pilar político segurança nian sira fo ona feedback, hodi nune Timor-Leste bele participa iha reunião sira ne’ebe mak uluk seidauk bele participa. Então, sira fo espaço luan ba Timor-Leste atu adapta’an iha reunião sira ne’e hotu. no ita continua hein resposta ba pilar sociocultural nian, e pois continua halo assessment ba pilar ikus nian iha fulan oin.
