Parlamento Nacional liu hussi sessão Plenária Ordinária iha loron 27 fulan outubro tinan 2020, liu hussi votação nominal ho votos 42 a favor, 0 contra no 0 abstenções, hodi autoriza Presidente República decreta Estado Emergência ba dahitu.
Estado emergência ba dahitu ne’e ho período loron 30 hahú horas 00:00 loron 4 fulan novembro too horas 23;59 loron 03 fulan dezembro tinan 2020, iha território tomak Timor-Leste nian, ho suspensão parcialmente ba direito balun hanessan; circulação internacional, liberdade de circulação e de fixação de residência em qualquer ponto do território nacional no direito de resistência.
Sessão Plenária Ordinária ne’e hahú ho abertura hussi Presidente Parlamento Nacional, tuir kedan Secretária da Mesa halo leitura ba guião nomos leitura ba mensagem hussi Presidente República, Francisco Guterres Lu-Olo, kona-ba pedido renovação Estado Emergência ba dahitu.
Iha mensagem refere menciona razão sira hodi hussu autorização Parlamento Nacional nian, hanessan numero caso vírus SARS-Co-2 ne’ebé hamossu Covid-19 iha nação vizinho hanessan Indonésia contínua aumenta liuliu Província Nusa Tenggara Timur (NTT) ne’ebe ninia geograficamente besik liu Timor-Leste.
Primeiro-Ministro, Taur Matan Ruak, iha nia intervenção hatete, tinan 2020 ne considera hanesan tinan Covid-19 moras contagiosa curculo ba mai iha mundo afeta no hamate ema no dificulta ema, famílias no comunidade nia moris social no económica. Hussi 30 casos positivo ne’ebé iha Timor-Leste, 29 recuperado no laiha mate, ne’e conquista coletiva ida ita nia povo no nação nian.
Tuir regime jurídico, medidas hotu Covid-19 sobele implementa ho rigor iha sociadade nia leet liu hussi Estado de Emergência ho fundamento iha situação calamidade pública.
Nune’e Governo hussu ba Parlamento Nacional atu autoriza Sua Excelência Presidente da Republica hodi decreta ba fulan ida tan renovação Estado de Emergência, depois de remata ida nebe vigora dadaun. Covid-19 seidauk hotu sei ativo no circúla ba mai iha mundo tomak, ita labele hussik atu moras at ida ne’e, bele hadaet na iha ita nia rain hodi perturba no hamate ita nia moris
Deputado sira continua hussu ba Governo atu responde ba necessidade povo nian iha situação estado emergência nian, tanba implementação estado emergência sira liu ba povo balun continua enfrenta dificuldade liuliu necessidade básico nian.
Representante povo mós hussu ba Governo atu hametin liu tan controlo iha linha fronteira sira liuliu fronteira terrestre atu evita movimento ema tama sai fronteiras hodi prevene moras refere labele da’et ba comunidade sira.
Além de ne’e, Deputado sira continua questiona pagamento ba família reclamantes no mos médicos no enfermeiros linha frente ne’ebé to’o agora Governo seidauk selu.
Sessão plenária ne’e preside hussi Presidente Parlamento Nacional, Aniceto Longuinhos Guterres Lopes, acompanha hussi membro Mesa sira, no hetan presença hussi Primeiro-Ministro, Taur Matan Ruak, ho membro Governo balun.
