Pagina Inicial»Noticia
Comissão E iha Parlamento Nacional ne’ebé trata assunto Infraestruturas iha loron 14 too 17 fulan outubro tinan 2020, hala’o fiscalização iha Município Ainaro.
Fiscalização ne’ebé lidera hussi Presidente Comissão E, Deputado Abel Pires da Silva, ne’e hahú ho reunião ho Administrador Município Ainaro, Albertino de Araujo, ho nia diretor sira hodi discute kona-ba projeto hirak ne’ebé implementa iha Município Ainaro.
Administrador Município Ainaro hatete projeto barak ne’ebé implementa iha 2016 no 2017 seidauk termina tanba dificuldade iha financeira no balun capacidade empresa sira no liuliu liga ba situação política rai laran.
Iha tinan 2018 no 2019, aumenta tanba projeto balun nune’e total projeto ne’ebé horas ne’e daudaun implementa iha Município Ainaro hamutuk 40 ressin.
Durante reunião, diretor sira hanessan Diretor Obras Publicas, Diretor Agencia de Desenvolvimento Nacional (ADN), Diretor Serviço Agua e Saneamento (SAS), no Diretor Eletricidade de Timor-Leste (EDTL), apresenta serviço hirak ne’ebé lao durante ne’e inclui dificuldade hirak ne’ebé sira hassoru iha tereno.
Iha loron daruak ba atividade fiscalização ne’e, Comissão E acompanha hussi Diretor Obras Publicas, Diretor ADN no Diretor EDTL, halo fiscalização ba estrada foun no ponte ne’ebé ligação hussi Suco Ainaro ba Suco Cassa, ne’ebé implementa hussi Empresa Jonize.
Hafoin ida ne’e continua kedas ba fiscalização iha subestação EDTL Cassa, hodi observa no reunião ho Diretor EDTL inclui técnico no segurança sira ne’ebé serviço iha subestação refere.
Iha reunião ne’e Diretor EDTL apresenta dificuldade sira hanessan menos equipamento ba manutenção, transporte no seluk tan hodi halo atendimento bainhira iha avaria ruma.
Ikus hussi atividade fiscalização refere, equipa Comissão E visita ba edifício EDTL, ADN, SAS no Obras Publicas hodi haree condição real inclui recurso humano sira hodi hala’o serviço iha município.
