Parlamento Nacional liu hussi Comissão F ne’ebé trata assunto Saúde, Segurança Social e Igualdade Género, halo reunião urgente ho Ministra Saúde, Odete M. F. Belo no mos Diretor SAMES, Santana Martins ho nia equipa, iha sala Conferencias Parlamento Nacional, iha loron 16 fulan outubro tinan 2020.
Iha reunião ne’e, Deputado sira hato’o preocupação relaciona ho fiscalização Comissão nian ba iha município sira no mos nacional hodi identifica problema sira mak hanessan: problema condição ambulância ba atendimento paciente sira; problema manutenção no combustível ba viaturas; problema espaço Posto Saúde sira nian; Aimoruk reserva iha SAMES; Atendimento ba saúde Veterano sira nian, problema facilidade saúde, no execução Fundo covid-19.
Relaciona ho preocupação hirak nee, Ministra Saúde hatete, problema sira ne’e liga ho área gestão, tan ne'e preocupação balun Ministério Saúde começa halo hela exercício ba nia processo, no preocupação balun Governo regista atu bele melhoria iha futuro.
Presidente Comissão F, Noel da Silva Ximenes "Buka Tuir" ba jornalista sira hatete, iha debate Orçamento Geral Estado 2021 nian, Comissão sei bolu nafatin Ministra Saúde no Vice-Ministro no mos Equipa Saúde ida-idak atu halo discussão detalhadamente hodi identifica problema sira.
Reunião nee preside husi Presidente Comissão F, Deputado Noé da Silva Ximenes "Buka Tuir", acompanha mos husi Deputado sira no mos técnico sira.
