Pagina Inicial»Noticia
Parlamento Nacional liu hussi Sessão Plenária Extraordinária, iha loron 01 fulan outubro tinan 2020, hahú ona halo discussão iha generalidade ba Proposta de Lei nº 22/V (3ª) - Orçamento Geral Estado tinan 2020 nian. Proposta de Lei ne’e apresenta hussi Primeiro-Ministro da República Democrática de Timor-Leste, Taur Matan Ruak, acompanha hussi Membro Governo sira.
Sessão Plenária ne’e, hahú ho execução Hino Nacional da República Democrática de Timor-Leste, hafoin ida-ne’e, Secretária da Mesa halo leitura ba guião discussão no votação Orçamento Geral Estado (OGE) nian, tuir kedas ho apresentação Primeiro-Ministro.
Iha apresentação Chefe Governo nian, lori VIII Governo Constitucional nia naran ho honra no humildade no sentido futuro nian, apresenta no hussu dala ida tan aprovação ba Proposta Lei Orçamento Geral Estado nian ba tinan fiscal 2020 nian, atu nune’e Governo bele cumpre promessa oin-oin mak hanessan halakon hamlaha, hamenos moris kiak, cria emprego digno no hussik hela hanessan liman-rohan ida ba geração foun sira, no País ida-ne’ebé prospero, pacifico, tolerante, inclusivo, sensível ba questão género no masque preocupa ho ninia cidadão sira nia moris haksolok «la haluha no la hussik hela ita nia maluk ida ba kotuk».
Primeiro-Ministro hatete fulan sanulu ikus ne’e idêntico hanessan tinan ida ho impasse politico, desastre naturais no crise ho naran Covid-19, maibé ho orçamento ida-ne’e no medida sira ne’ebé hala’o hela sei remata tinan ne’e ho fiar metin katak 2020 mós sei sai conhecido hanessan tinan resistência e resiliência povo Timor-Leste nian.
Além de ne’e, Primeiro-Ministro mós hatete, ho aprovação Parlamento Nacional maka Estado sei mobiliza receita no realiza despesas públicas ho montante US $ 1.497,1 milhões ne’ebé hussi $ 671,292,000.00 ne’ebé corresponde ba valor total executado entre fulan janeiro to’o loron 30 fulan setembro tinan 2020; $ 117,100,000.00, ne’ebé corresponde ba valor total hussi dotação orçamental temporária ne’ebé prevê ba fulan outubro iha âmbito regime duodecimal; no $ 708,708,000.00, ne’ebé corresponde ba valor total hussi orçamento previsto atu executa entre fulan novembro no fulan dezembro tinan 2020.
Hafoin de apresentação hussi Primeiro-Ministro, Comissão C ne’ebé trata Assunto Finanças Públicas halo apresentação ba conclusão no recomendação hussi relatório no parecer ba proposta de Lei Orçamento Geral do Estado 2020. Depois de ne’e, tuir kedan ho intervenção diversas hussi Deputado sira no resposta hussi Governo ba preocupação sira ne’e sei hato’o iha sessão plenária loron tuir, sexta-feira, 02 fulan outubro tinan 2020 no continua ho aprovação iha generalidade
Sessão plenária ne’e, preside hussi Presidente Parlamento Nacional, Aniceto Longuinhos Guterres Lopes, acompanha hussi Membro da Mesa sira, conta mos ho presença Primeiro- Ministro da República Democrática de Timor-Leste, Taur Matan Ruak hamutuk ho membro Governo sira.
