Pagina Inicial»Noticia
Parlamento Nacional hamutuk ho nia parceiro sira hanessan Programa das Nações Unidas para o Desenvolvimento (PNUD) no União Europeia, iha loron 30 fulan setembro tinan 2020, halo lançamento fatuk dahuluk ba Uma Komunikasaun iha Parlamento Nacional.
Ho estabelecimento Uma Komunikasaun ne’e garante liu tan comunicação ida eficaz entre Parlamento ho cidadão sira, promove transparência, no política ida nakloke iha instituição hodi cria condição ba jornalista sira hodi desenvolve serviço ho di’ak.
Alem de ne’e Uma Komunikasaun ne’e parte ida hussi abordagem atividade sira seluk hanessan digitalização ba reunião sira iha Parlamento Nacional, produção vídeo sira ba educação cívica no formação ba TV Parlamento Nacional no Mobile APP ba Parlamento Nacional.
Iha discurso Presidente Parlamento Nacional, Aniceto Longuinhos Guterres Lopes, agradece ba apoio hussi parceiro sira hodi desenvolve di’ak liu tan Parlamento Nacional liuliu iha área comunicação nian, tanba papel media no jornalista sira importante no essencial hodi responde ba risco sira ne’ebé afeta ba democracia iha Timor-Leste hanessan mós iha nação seluk.
Uma Komunikasaun ne’e condição ida ba jornalista sira atu desenvolve serviço ne’ebé qualidade ho informação ne’ebé claro ba cidadão sira.
Parlamento Nacional hanessan fatin debate político hodi aprova politica publica ida ba interesse povo nian ne’ebé sustentável, nune’e ho meios ida-ne’e bele iha comunicação entre povo ho nia representante ne’ebé eficiência no eficácia.
Representante PNUD, Munkhtuya Altangerel, iha nia discurso hatete Uma Komunikasaun ne’e hanessan espaço di’ak ba jornalista sira atu divulga atividade sira Parlamento Nacional nian.
Liu hussi informação hirak ne’ebé jornalista sira publica, cidadão sira bele acompanha no analisa atividade Deputado sira-nian, tanba ne’e PNUD apoia iniciativa refere hodi harii Uma Komunikasaun iha Parlamento Nacional.
Tanba liu hussi atividade jornalística sira promove sociedade mais democrático iha processo desenvolvimento.
Embaixador União Europeia iha Timor-Leste, Andrew Jacobs, hatete programa refere atu cria espaço ba sala imprensa no conferência da imprensa nian.
Nune’e jornalista sira acreditado bele utiliza ho facilidade ne’ebé mak iha hodi bele apoio serviço ne’ebé qualidade liu tan, hametin relação entre Parlamento ho media ba publicação informação legislativa.
Hafoin discurso, Presidente Parlamento Nacional acompanha hussi representante PNUD, Munkhtuya Altangerel, Embaixador União Europeia, Andrew Jacobs, Secretario Estado ba Comunicação Social, Mericio Juvinal Akara, Deputado sira, Secretária-Geral Parlamento Nacional, Cedelizia Faria dos Santos, no convidado sira seluk dirige ba hodi tau fatuk dahuluk.
