Pagina Inicial»Noticia
Parlamento Nacional liu hussi sessão Plenária ordinária iha loron 29 fulan setembro tinan 2020, aprova ona Projeto Resolução n.o 59/V (3ª), orçamento privativo ba tinan 2021 ho montante $16.984.006.
Hussi montante $16.984.006 ne’e fahe ba categoria Salario no Vencimento $5.581.038; Bens e Serviços $6.250.029; Capital Menor $492.796; Capital de Desenvolvimento $3.000.000; e Transferências $1,660,203.
Durante discussão, maioria Deputado sira concorda hodi implementa política poupança nune’e precisa haree plano no programa ho eficiência no eficácia hodi contribui ba sustentabilidade serviço parlamentar, liuliu secretariado hodi presta serviço ba Deputado sira.
Alem de ne’e, Deputado sira mós sugere atu reduz orçamento ba viagem estrangeiro tanba horas ne’e daudaun mundo preocupa hela ho Covid-19. No manutenção ba viatura sira Parlamento nian tanba maioria viatura hirak ne’e ho condição ladún di’ak.
Construção edifício foun Parlamento Nacional mós sai preocupação Deputado sira-nian tanba la iha ona espaço suficiente ba Deputado no funcionário sira atu halo serviço tuir necessidade ne’ebé mak iha.
Ho preocupação hirak ne’e, Deputado sira halo votação iha generalidade ba Projeto de Resolução ne’e ho 39 votos a favor, 0 contra no 19 abstenções.
Hafoin ida-ne’e continua kedas ba discussão especialidade hodi discute cada categoria orçamental refere.
Liu hussi discussão naruk, Deputado sira halo aprovação final global ba orçamento privativo ne’e ho 41 votos a favor, 0 Contra, 8 Abstenções, Deputado na’in 3 la vota.
Sessão Plenária ne’e preside hussi Presidente Parlamento Nacional, Aniceto Longuinhos Guterres Lopes, acompanha hussi membro Mesa sira no hetan presença hussi Secretária-Geral Parlamento Nacional, Cedelizia Faria dos Santos, ho nia equipa.
