Pagina Inicial»Noticia
Parlamento Nacional, iha loron 04 fulan setembro tinan 2020, hala’o cerimónia ritual no religiosa hodi hatuur hikas Mesa Presidência Parlamento Nacional, ne’ebe mak hetan estragos iha loron 19 fulan maio tinan 2020.
Cerimónia ne’ebe realiza iha sala plenária ne’e ho presença hussi Lia-Na’in sira ne’ebé mai hussi município 12 no RAEOA.
Cerimonia refere hahú ho sergala, hamulak ba rai lulik no matebian sira, objeto ritual mak hanessan Bua, Malus no seluk tan hodi hatuur hikas iha Tribuna Mesa Presidência Parlamento Nacional. Hafoin ida-ne’e Lia-Na’in sira tula liman ba objetos ritual sira ne’ebé mak hatuur ona ho hamulak ba bei’ala no heróis sira hussu paz no hakmatek.
Iha parte lokraik, Misa ba bênção mesa, iha Igreja Catedral Díli, hafoin de Misa, lori hikas mesa mai Parlamento Nacional hodi hala’o cerimónia ikus hatuur mesa iha sala Plenária Parlamento Nacional.
Iha cerimónia ne’e, Presidente Parlamento Nacional, Aniceto Longuinhos Guterres Lopes, iha nia discurso hatete, Parlamento Nacional nu’udar órgão de decisão política tenki funciona. Tuir constituição koloka Parlamento Nacional iha fatin central ba decisão boot iha Estado no sai democracia representativo lori povo tomak nia naran. Mesa Parlamento Nacional nudar símbolo poder, liderança, confiança, respeito no sai fatin ba representante povo sira, dirige, orienta no controla ba debates kona-ba assunto Estado ninian. Ho cerimonia cultural reposição Mesa Presidência Parlamento Nacional nian iha Salão Plenária uma fukun Parlamento Nacional, hotu-hotu iha responsabilidade tane as nafatin imagem Parlamento Nacional lori Deputado atual sira nia naran hato’o agradece wain ba Maromak no Beiala sira, ba Asuain sira ne’ebe luta lori Timor-Leste ba ukun rassik’an, agradece mos ba lia nain sira no mos convidado sira hotu.
Participa iha cerimonia ne’e, Ex-Deputado Assembleia Constituinte, representante Membro Governo nian, Deputado sira, conta mos ho presença representante lia-nain hussi Município 12 inclui RAEOA.
