Pagina Inicial»Noticia
Parlamento Nacional liu hussi Sessão Plenária extraordinária iha loron 3 fulan setembro tinan 2020, autoriza Presidente República hodi decreta estado emergência ba dalimak ho duração loron 30, hahú hussi horas 00:00 loron 5 fulan setembro termina iha horas 23:59 loron 4 fulan outubro tinan 2020.
Hanessan implementação estado emergência liu ba, halo de’it suspensão ba direto balun hanessan Circulação Internacional, ne’ebé estabelece controlo sanitário iha porto, aeroporto ou ponto entrada fronteira terrestre nian, hodi previne covid-19; Liberdade Circulação no Fixação Residência iha território nacional no Direito Resistência.
Iha apresentação inicio Primeiro-Ministro, Taur Matan Ruak, hatete razão principal Governo nian hodi hussu Presidente República decreta estado emergência ba dalimak ho autorização Parlamento Nacional tanba numero covid-19 iha nação vizinho sira hanessan Indonésia no Austrália continua aumenta, nune’e Governo precisa reuni nia esforço hodi previne moras refere.
Entretanto Deputado sira preocupa makas ba equipa front line balun ne’ebé too agora seidauk hetan pagamento inclui hotel sira. Sugere mós atu Governo serio hodi implementa programa recuperação económica, no fó subsidio ba estudante sira iha estrangeiro.
Hatán ba preocupação sira ne’e, Primeiro-Ministro hatete, Governo continua esforço hodi resolve dificuldade sira ne’ebe nação enfrenta principalmente prevenção no combate covid-19. Hanessan circulação ilegal iha fronteira terrestre, Governo hussi tempo ba tempo continua consolida hodi halo controlo ne’ebé máximo liu tan tanba entre população hirak ne’ebé hela iha fronteira iha relação cultural ne’ebé makas nune’e facilita hodi acontece passagem ilegal.
Tanba Governo considera katak caso covid-19 ne’e importado nune’e hussi medida ne’ebe mak iha fortifica iha área fronteira nian, enquanto iha município sira seluk iha flexibilidade barak hodi continua vida economia no seluk tan.
Liu hussi discussão naruk, Deputado sira liu hussi votação nominal ho 40 Votos a favor, 0 contra no 7 Abstenções, nune’e autoriza ba Presidente República hodi decreta estado emergência ba dalimak iha território nacional.
Sessão Plenária ne’e preside hussi Presidente Parlamento Nacional, Aniceto Longuinhos Guterres Lopes, acompanha hussi membro Mesa sira, no hetan presença hussi Primeiro-Ministro ho nia membro Governo sira.
