Pagina Inicial»Noticia
Deputado sira Parlamento Nacional, iha loron 19 fulan agosto tinan 2020, liu hussi sessão plenária ordinária Comissão Permanente nian, hato’o preocupação kona-ba necessidade básica população nian.
Iha intervenção diversas, Deputado sira contínua questiona kona-ba acesso bee moos, estrada, eletricidade, subsídio ba idosos, educação, atribuição naran Ponte Laleia, subsídio Covid-19 nian ba jornalista linha oin, publicação notícia iha Jornal Timor Post, processo fibra ótica, no informação importante sira seluk.
Hatán ba preocupação sira ne’e, Secretário de Estado, Comunicação Social, Mericio Juvenal Akara, hatete, em relação ho processo fibra ótica, Governo tau ona prioridade no oras ne’e daudaun lao hela; kona-ba naran ponte Laleia, Governo acompanha ideias preocupação comunidade sira nian, Governo tetu no analisa, no Conselho Ministro decide hodi fó naran Nelson Mandela; liga ho problema eletricidade iha Suco sira, Governo tau ona iha programa prioridade nian ba eletricidade ba sucos 77 iha território laran tomak, ninia implementação faseadamente, balun sei conclui iha tinan 2021 no balun iha tinan 2022; kona-ba publicação iha Jornal Timor Post, Governo sei comunica ho Conselho de Imprensa hodi hala’o sira nia knaar; informação seluk sei encaminha ba ministérios revelantes hodi resolve.
Sessão plenária ne’e, presidi hussi Presidente Parlamento Nacional, Aniceto Longuinhos Guterres Lopes, acompanha hussi membro da Mesa sira, ho presença hussi Secretário de Estado, Comunicação Social, Mericio Juvenal Akara.
