Pagina Inicial»Noticia
Parlamento Nacional liu hussi reunião plenária extraordinária iha loron 29 fulan julho tinan 2020, liu hussi votação hili Fausto Freitas da Silva «Liurai-Tasi», hodi sai membro ba Comissão da Função Pública (CFP).
Candidato na’in tolu ne’ebé compete liu hussi eleição escrutino ba membro CFP, ne’ebé apresenta hussi bancada sira hanessan João Pereira apresenta hussi bancada UDT/FM, Fausto Freitas da Silva «Liurai-Tasi» apresenta hussi bancada FRETILIN, no João Mestre Cruz Verdial apresenta hussi bancada KHUNTO.
Nune’e hussi resultado eleição ne’e hatudu candidato Fausto Freitas da Silva «Liurai-Tasi», hetan votos barak liu 38, compara ho candidato sira seluk, João Pereira hetan votos 17 no João Mestre Cruz Verdial hetan votos 5.
Fausto Freitas da Silva «Liurai-Tasi», moris iha Quelicai Município Baucau iha loron 7 fulan abril tinan 1963, habilitação literária Mestrado iha Gestão Recurso Humano, no hanessan mós eis membro Parlamento Nacional iha IV Legislatura hussi bancada FRETILIN.
Entretanto agenda ba constituição comissão permanente adia ba loron 30 fulan julho tinan 2020 hodi decide liu hussi sessão plenária extraordinária.
Sessão Plenária ne’e preside hussi Vice-Presidente do Parlamento Nacional, Maria Angelina Lopes Sarmento, acompanha hussi membro Mesa sira seluk.
