Pagina Inicial»Noticia
Parlamento Nacional liu hussi Comissão F ne’ebe trata assunto Saúde, Segurança Social e Igualdade Género, ne’ebe lidera hussi Presidente Comissão, Deputado Noé da Silva Ximenes “Buka Tuir”, acompanha hussi membro sira hala’o fiscalização iha Municipio Bobonaro, iha loron 8 too 10 fulan julho tinan 2020.
Atividade fiscalização ne’e realiza relaciona ho Covid-19 ne’ebé mundo preocupa, inclui Timor-Leste. Masque liu ona estado emergência maibé movimento iha linha fronteira terrestre continua lao, tanba ne’e Comissão F realiza nia fiscalização iha área fronteira liuliu Mota-ain, hodi haree diretamente movimento iha área refere, inclui Quarentena ne’ebe Governo prepara hodi isola cidadão hirak ne’ebe tama iha fronteira.
Liu tiha ida-ne’e, delegação Comissão F continua kedas ba Suco Cowa, Posto Administrativo Balibo, ne’ebe bessik liu área fronteira terrestre nian no risco ba movimento ilegal iha área refere. Aproveita oportunidade Comissão F observa condição real equipa segurança hanessan F-FDTL no UPF hodi hala’o controla máximo.
Sorin seluk, iha atividade ne’e comissão mos simu preocupação barak liga ba estrada, eletricidade, inclui família vulnerável sira hodi informa ba ministério relevante hodi responde.
Ikus hussi atividade ne’e, Comissão F halo reunião ho Presidente Autoridade Município Bobonaro, Diretor de Saúde, Diretor MSSI, Comandante PNTL Municipio Bobonaro nomos Comandante UPF, hodi halo discussão ida kona-ba prevenção Covid-19 iha área fronteira nian.
