Comissão G Parlamento Nacional, ne’ebe trata assuntos Educação, Juventude, Cultura no Cidadania, iha loron 8 to’o loron 10 fulan julho tinan 2020, halao fiscalização ba iha Escola sira iha Município Liquiçá mak hanessan, Escola Ensino Básico Central Casait; Escola Pre-Escolar Casait; Escola Católica Santo Inácio de Loiola Casait; Escola Secundaria Geral Hu Isu Lara Iso Liquiçá nomos Escola Secundaria Técnico Vocacional Município Liquiçá.
Iha Fiscalização ne’e ba dahuluk Presidente Comissão G ho nia Comitiva halao sorumutuk ho Administrador Município Liquiçá, Domingos da Conceição dos Santos, no Diretor Educação Município Liquiçá, Zito António Oliveira da Costa ho nia comitiva.
Iha sorumutuk ne’e, Diretor Educação Município Liquiçá ne’e informa ba Deputado sira, kona-ba serviço sira hahu fulan janeiro to’o inicio fulan julho tinan 2020, liu liu liga ba situação Estado de Emergência, mak hanesan processo reativa escola sira, nune’e mos dificuldade ligado ho infraestrutura no menus professores. Além de ne’e, informa mos kona-ba dadus escola ne’ebé mak existe iha Município Liquiçá ho total hamutuk 110.
Iha biban hanesan Presidente Comissão G, António Verdial de Sousa hatete, durante audiência ho Administrador Município Liquiçá no Diretor Educação Municipal nian, sira apresenta dificuldade mak hanesan, condição escola ladiak, menos professores no assunto importante seluk. Preocupação sira ne’e, Comissão sei apresenta iha nia relatório ba Plenário hodi hetan apreciação no halo recomendação ba ministério relevante hodi tau iha consideração.
Fiscalização ne’e lidera hussi Presidente Comissão G, António Verdial de Sousa, acompanha hussi Membro Comissão hamutuk ho técnico sira.
