Comissão A ne’ebe trata assuntos Constitucionais e Justiça, iha loron 7 fulan julho tinan 2020, continua hala’o discussão ba Projeto de Lei Anticorrupção, hussi artigo 20 ba oin, iha Aisirimou- Município Aileu
Iha continuação discussão ne’e, Deputado sira Comissão A hamutuk ho entidade judiciária sira, halo analisa ida entre Lei Anticorrupção ho nação sira seluk hanessan: Haiti, Benin, Niger, Madagascar, Congo, Equador no sira seluk, hodi compara mos ho artigo sira iha Projeto de Lei Anticorrupção ne'ebe discute daudaun.
Comparação ne’e halo liga ba artigo 22 ne’ebe regula kona-ba Posse de Riqueza Injustificada, atu Deputado sira iha ideia ka opinião hodi bele hamosu discussão ida profunda. Durante discussão, Deputado sira no entidade judiciária sira tenta identifica mos parte hirak ne’ebe bele facilita processo implementação lei ho nia dificuldade sira.
Discussão ne’ebe preside hussi Presidente Comissão A, Deputado Joaquim dos Santos “Boraluli”, sei continua iha loron 8 fulan julho hodi aprova artigo hirak ne’ebe seidauk hetan aprovação.
