Pagina Inicial»Noticia
Parlamento Nacional liu hussi Sessão Plenária ordinária iha loron 29 fulan junho tinan 2020, Plenário halo apreciação ba relatório anual 2019 hussi Provedoria Direitos Humanos e Justiça, relatório ne’e rassik apresenta hussi Provedora Jesuina Maria Ferreira Gomes ho nia equipa.
Durante apresentação, Deputado sira ko’alia liu kona-ba assunto boa governação, inclui violação diretos humanos iha Timor-Leste.
Entretanto iha intervenção diversas, ba período de antes da ordem do dia nian, Deputado sira levanta problema mak hanessan; Estudante não bolseiras iha estrangeiros to’o agora seidauk simu subsidio; Segurança iha estação EDTL iha Timor-Laran la simu salario desde julho tinan 2019 to’o agora; subsidio uma kain to’o agora família balun seidauk simu.
Alem de ne’e, Deputado sira mos foti problema kona-ba Estado de Emergência ne’ebé hotu ona, no agora ema balun hussi Indonésia tama mai Timor liu hussi terrestre, oinsá ninia controlo sira;
Informação seluk ne’ebé levanta hussi Deputado sira mak hanessan; professores contratado sira to’o agora seidauk simu salário; pessoal limpeza iha hospital referencia Maubisse la simu salário; la iha manutenção regular ba kareta ambulância sira; no mos informação kona ba necessidades básicos mak hanessan, falta bee moos, Eletricidade, Estrada no informação importante sira seluk.
Hatán ba preocupação sira ne’e, Ministro dos Assuntos Parlamentares e Comunicação, Francisco Jerónimo hatete, pagamento ba Estudante não bolseiro iha rai li’ur, Governo haruka ona ossan ba embaixada no mos cônsul sira nia conta bancaria, Embaixador no consulado sira mak sei halo pagamento ba estudante sira, hanessan Indonésia, Kupang halo ona pagamento iha semana kotuk, Fatin sira seluk hahú ohin halo pagamento.
Em relação ho subsídio uma kain, balun ne’ebé mak seidauk simu tama ona iha reclamação no Governo sei halo pagamento. Nune’e mos ho problema Estado de Emergência ne’ebé hotu ona, Governo antecipa Lei Saúde hodi halo prevenção tanba corona vírus ne’e sei iha, tan ne’e ema ne’ebé mak tama sempre iha controlo.
Ikus liu, Governante ne’e mos informa ba plenário katak, Governo halo ona emissão passaportes online iha município balun ona.
Sessão Plenária ne’e preside hussi Vice-Presidente Presidente do Parlamento Nacional, Luis Roberto da Silva, acompanha hussi membro Mesa sira, no hetan presença hussi Ministro dos Assuntos Parlamentares e Comunicação, Francisco Gerónimo, ho nia equipa.
