Pagina Inicial»Noticia
Comissão D iha Parlamento Nacional ne’ebe trata assunto Economia e Desenvolvimento, iha loron 24 to’o 26 fulan junho tinan 2020, hala’o fiscalização iha Município Covalima.
Atividade fiscalização ne’e hahú ho audiência ho Diretor Agricultura Município Covalima, hodi rona informação kona-ba horticultura, plantas, comercio, pecuária, veterinária no floresta. Iha explicação Diretor Agricultura relata kona-ba produção horticultura hanessan batar no hare iha Covalima.
Iha loron tuir mai, membro sira comissão nian fahe ba grupo rua hodi halo fiscalização iha Posto Administrativo Fatululik no Posto Administrativo Suai. Iha Posto Administrativo Fatululik lidera hussi Secretário Comissão, Deputado Alexandrino Cardoso da Cruz, hala’o uluk audiência ho Administrador Posto Administrativo Fatululik, Elias da Cruz no Extensionista Covalima, Quintino da Cruz, no continua kedas ba visita grupo Hadomi Natureza ne’ebe kuda Sabraka Tengarrinha iha aldeia Taroman, grupo comunidade kuda liis mutin no liis mean iha suco Fatululik, no ikus liu visita ba grupo Hakfodak ne’ebe hakiak ikan (pecuária) iha Suco Taroman, nomos encontro ho comunidade sira ne’ebe hakiak Vanili iha aldeia Fatuloro.
Entretanto grupo ne’ebé lidera hussi Presidente Comissão, Deputado Antoninho Bianco, hala’o fiscalização ba Suco Beco no Suco Suai Loro. Iha Suco Beco delegação haree irrigação ne’ebe harii iha tempo Indonésia nian ne’ebé distribui bee ba natar comunidade sira-nian, maibé la funciona ona no visita mós irrigação tradicional iha Suco Tasilin ne’ebé constrói rassik hussi comunidade sira, no ikus liu visita mós grupo MOKATIL ne’ebe mak produz batar Sogun.
Ba loron datoluk nian, delegação hala’o fiscaliza ba irrigação iha Suco Raimea, observa direitamente ba mota Queitai ne’ebe aat ona nune’e la bele canaliza bee ba natar no continua ba irrigação Beluli no reunião ho Presidente da Associação Agricultura, Guilherme da Costa.
Atividade fiscalização ne’e lidera hussi Presidente Comissão, Deputado Antoninho Bianco, acompanha hussi membro sira no técnico comissão nian.
