Pagina Inicial»Noticia
Comissão E iha Parlamento Nacional ne’ebé trata assunto Infraestrutura, iha loron 17 too 18 fulan junho tinan 2020, hala’ó-nia fiscalização iha Município Bobonaro.
Atividade fiscalização ne’ebé lidera hussi Presidente Comissão E, Deputado Abel Pires da Silva, ne’e hahú observa uluk quarentena iha Fronteira Batugade, ne’ebé bele acumula cidadão sira ne’ebé hakat liu fronteira mai Timor-Leste.
Hafoin observa quarentena, delegação Comissão E continua ba edifício Administração Município Bobonaro hodi reunião ho Presidente da Autoridade Município Bobonaro, Zeferino dos Santos, antes hakat ba fiscalização projeto sira.
Durante reunião ho Presidente da Autoridade Município Bobonaro, ko’alia liu kona-ba projeto hirak ne’ebé tama iha Município Maliana, ho nia execução projeto sira. Hussi projeto sira ne’e barak la iha controlo hussi Município tanba considera projeto nacional.
Enquanto projeto balun ne’ebé supervisiona hussi município maioria nia execução lao di’ak mas que iha impedimento uitoan.
Informa mós ba Deputado sira Comissão E nian kona-ba condição irrigação Maliana I, II no Loes nian ne’ebé aat ona hodi dificulta ba povo agricultor sira, no afeta ba produção hare.
Sorin seluk, relata mós kona-ba condição estrada rural sira ne’ebé maioria sei aat, ponte sira inclui edifício instituição sira hahú aat daudaun.
Presidente Comissão E hatete comissão precisa observa no rona preocupa barak hussi autoridade sira nune’e bele considera iha Orçamento Geral do Estado. Enquanto kona-ba supervisão projeto sira precisa iha cooperação di’ak entre obras pública município no ADN inclui administração município atu assegura qualidade projeto sira.
Hafoin reunião ho Presidente da Autoridade no diretor sira, delegação continua ba observa construção gabião (bronjong) iha mota Bulobu, Suco Manapa, ponte no subestação EDTL Maliana.
Comissão E mós hassoru malu ho pessoal Lorosae Segurança sira iha subestação EDTL Maliana ne’ebé tinan ida ona la simu sira-nia salario.
Iha loron tuir mai, delegação Comissão E continua ba observa no rona informação barak hussi Diretor Obras Publica Município Bobonaro, António Soares, kona-ba implementação projeto sira iha Município Bobonaro, inclui preocupação hirak ne’ebé parte obras publica deteta kona-ba controlo ka supervisiona projeto sira.
