Parlamento Nacional liu hussi Sessão Plenária Ordinária iha loron 8 fulan junho tinan 2020, halo debate ba Conta Geral do Estado 2018 nian.
Debate ne’e hahú ho introdução hussi Ministro das Finanças, Fernando Hanjam ho nia Vice-Ministra Sara Lobo Brites, kona-ba Conta Geral do Estado ne’e, hafoin continua kedas ba apresentação relatório no parecer Comissão C ne’ebé trata assunto Finanças Públicas, hussi relator sira Deputada Maria Angelina Lopes Sarmento, Deputado António da Conceição no Deputado Antonio Maria Nobre Amaral Tilman.
Kona-ba relatório no parecer ne’e, Ministro das Finanças hatete Governo continua iha compromisso atu melhoria gestão financeira no recomendação hirak ne’ebé Comissão das Finanças Públicas menciona balun Governo implementa ona no balun implementa daudaun hela.
Tanba hussi recomendação balun Governo prevê ona iha lei no contínua reforça sistema gestão financeira no seluk tan.
Entretanto Deputado sira questiona kona-ba taxas no auditoria hirak ne’ebé durante ne’e Governo halo no retorno ne’ebé Governo hetan. Tanba ne’e ba oin Governo precisa haree didi’ak lei gestão financeira no regra seluk hodi assegura funcionamento financeira ba instituição estado.
Sessão debate ne’e preside hussi Presidente do Parlamento Nacional, Aniceto Longuinhos Guterres Lopes, acompanha hussi membro da Mesa sira no hetan presença hussi Ministro das Finanças, Fernando Hanjam, ho nia equipa no Ministro dos Assuntos Parlamentares e Comunicação Social, Francisco Jerónimo.
