Pagina Inicial»Noticia
Parlamento Nacional iha loron 01 fulan junho tinan 2020, liu hussi Plenária ordinária halo debate ho Governo kona-ba implementação ba medida económica no social iha prevenção no combate Covid-19.
Debate refere hahú ho execução hino nacional no minuto ida hakmatek ba Saudoso Ex-Presidente do Parlamento Nacional, Fernando Lasama de Araújo, nia loron mate.
Iha debate ne’e, Governo representa hussi Ministro da Presidência do Conselho de Ministros, Fidélis Manuel Leite Magalhães, acompanha hussi Ministro das Finanças, Fernando Hanjam, ho nia equipa sira.
Iha apresentação, Ministro da Presidência do Conselho de Ministros, no Ministro das Finanças, explica kona-ba medida hirak ne’ebé Governo foti liuliu ba recuperação económica iha âmbito prevenção no combate Covid-19. Governo contínua esforço máximo hodi responde ba dificuldade sira no preocupação ne’ebé comunidade sira enfrenta.
Entretanto Deputado sira exige ba Governo atu acelera lalais recuperação económica tanba horas ne’e daudaun população barak enfrenta dificuldade tanba la'ós de’it Covid-19 maibé enfrenta mós inundação iha município sira.
Iha Período de Antes da Ordem do Dia nian, bancada Parlamentar PD no FRETILIN apresenta declaração politica kona-ba situação politica no funcionamento órgão soberania sira.
Sorin seluk, iha intervenção Deputado sira preocupa kona-ba desastre naturais ne’ebé acontece iha município sira, subsidio ba equipa sira ne’ebé apoia direta no indireta ba prevenção no combate Covid-19, no assunto sira seluk liga ba desenvolvimento nacional.
Sessão Plenária ne’e preside hussi Presidente do Parlamento Nacional, Aniceto Longuinhos Guterres Lopes, acompanha hussi membro da Mesa sira, no hetan presença hussi Ministro da Presidência do Conselho de Ministros, Fidélis Manuel Leite Magalhães, ho nia equipa.
