Pagina Inicial»Noticia
Parlamento Nacional, liu hussi Sessão Plenária Extraordinária iha loron 27 fulan maio tinan 2020, halo apreciação no discussão ba pedido hussi Presidente República kona-ba renovação ba pedido declaração Estado Emergência nian iha território nacional, durante loron 30, hahú iha horas 00:00 loron 28 fulan maio too horas 23:59 loron 26 fulan junho tinan 2020.
Iha carta Presidente República, Francisco Guterres Lú-Olo, ne’ebé dirigi ba Parlamento Nacional, expressa preocupação kona-ba continuidade existência vírus Covid-19 iha nível global, foca essencialmente ba permanência iha nação Indonésia, hanessan único nação ne’ebé ho linha fronteira terrestre ho Timor-Leste. Ho razão ida-ne’e, clarifica katak necessário tebes atu prolonga ba vigilância epidemiológica ba moras ida-ne’e atu la bele mossu tan caso importação mai iha território nacional, ho nune’e, tem que iha nafatin medidas ba prevenção ba entrada no transmissão ba vírus no medidas de controlo sanitário. Nune’e mós, apela katak renovação ba Estado de Emergência iha território nacional ida-ne’e ho suspensão ba aspeto fundamental tolu ba direito sira mak hanessan, circulação internacional, liberdade de circulação no fixação iha residência iha qualquer território nacional nian no resistência.
Primeiro-Ministro, Taur Matan Ruak, hahú fó oportunidade ba Porta-Voz do Centro Integrado de Gestão de Crise, Donaciano da Costa Gomes, Capitão de Mar e Guerra, hodi halo apresentação ba ponto de situação vírus Covid-19 iha Timor-Leste. Iha nia apresentação hodi refere katak importante atu continua controla possível propagação hussi vírus iha Timor-Leste, ho reforça ba mecanismo de rastreio, identificação no contenção, nune’e mós tem que ho rigor no disciplina ba controla fronteira sira, iha transporta moras sira ba quarentena, ba realização teste sira nomos iha acompanhamento médico sira. Donaciano da Costa Gomes esclarece, sei halo reorganização ida ba medida sira ba prevenção vírus iha hospital nomos centro de saúde sira no sei consolida recursos médicos, mak hanessan atu halo realização teste ho maior quantidade iha município sira hotu, no nia prioridade ba ema sira ne’ebé ho idade 60 ba leten.
Hafoin ida-ne’e, Primeiro-Ministro, Taur Matan Ruak, halo intervenção hodi reforça katak importação vírus ne’e agora daudaun lao hela, tanba ne’e, nação labele hamenos no termina ninia prevenção, principalmente medidas tolu ne’ebé maka apresenta hussi Presidente da República. Primeiro-Ministro mós hatete katak escola sira tem que loke fila fali no tem que retoma fali atividades económicas, ho regras distanciamento social.
Iha intervenções diversas, Deputado sira hatudu a favor ba extensão Estado de Emergência ho restrições balun mak hanessan mantem taka fronteira sira ho controla máximo iha município Maliana, Suai no Oecússi, usa máscara iha fatin público sira nomos mantem distanciamento social. Além de ne’e, sustenta necessidade hodi retoma serviços públicos hotu, iha mercado de trabalho no iha atividades económicas no loke fila fali escola sira, família barak precisa começa halo serviço hodi bele sustenta sira nia família nomos labarik no jovem barak mak la iha recurso hodi participa iha sistema aulas ho distância.
Iha parte seluk, Deputado sira hatudu nafatin sira nia preocupação relaciona ho pagamento subsídio ba família kbiit laek no subsidio ba estudante iha nação seluk ne’ebé tarde, nune mós relaciona ho fundo combate Covid-19, ne’ebé to’o agora nia execução sei mínimo.
Hafoin discussão naruk, Deputado sira hakat ba votação ho 40 votos a favor, 1 contra, no 0 abstenções.
Participa iha Sessão Plenária ne’e mak Presidente do Parlamento Nacional, Aniceto Longuinhos Guterres Lopes, acompanha hussi Vice-Presidente sira, Primeiro-Ministro, Taur Matan Ruak, no membro do Governo balun.
