Parlamento Nacional, liu hussi Sessão Plenária ordinária, iha loron 26 fulan maio tinan 2020, Deputado sira halo apreciação ba relatório anual 2019 Comissão Anti-Corrupção nian, relatório ne rassik apresenta hussi Comissário Comissão Anti-Corrupção (CAC), Sérgio de Jesus Fernandes da Costa Hornai.
Iha apresentação, comissário informa katak, total caso ne’ebe mak Comissão Anti-corrupção atende iha tinan 2019 hamutuk 73 casos, hussi total ne’e, casos 13 mai hussi caso pendentes tinan 2018 nian. Hatutan mos katak, hussi caso sira ne’e, CAC apresenta ona total caso 43 ba ministério público atu promove ação.
Iha intervenção diversas, Deputado sira mos koalia kona-ba extensão situação Estado de Emergência precisa explicação hussi Governo iha Parlamento. Iha parte seluk, Deputado sira mos realça katak, Estado Emergência, execução orçamento mos tenki executa ho emergência, husu Ministério Finanças atu cria regras específicos atu bele implementa, hodi bele facilita serviço hotu mak hanesan atende necessidades população sira ligado ho subsidio ne’ebe mak Governo promete ona no serviço seluk tan.
Iha parte seluk, Deputado sira koalia kona-ba apoio transportes ba Polícia Nacional Timor-Leste (PNTL), liga ho acontecimento sira hanessan incêndio iha Mercado Taibessi resulta ema ida mate, ema desconhecido hana ema iha tempo kalan, no seluk tan, segurança sira labele to’o lalais fatin acontecimento hodi atua tanba sira laiha transporte. Alem de ne’e, Deputado sira mos hussu Comando PNTL atu cria posto segurança iha fatin sira ne’ebé mak identificado ona.
Deputado sira hussu Governo, atu submete relatório de execução orçamento de cada mês no mos relatório transferência orçamento ho ho montante $250 milhões. Nune mos informação kona-ba paciente ne’ebá halo hela tratamento saúde iha Jakarta-Indonesia la simu osan han nian quase fulan haat ona.
Hatan ba preocupação hussi Deputado sira, Secretário de Estado Comunicação Social, Mericio Juvenal, hatete, relaciona ho extensão Estado de Emergência, mesmo Timor-Leste laiha ona caso, maibe vírus ne’e sei existe no bele ataka fila fali tanba seidauk iha aimoruk, Estado de Emergência ida ne’e, nia regras sei la makas hanesan uluk maibe sei contínua taka fronteira sira, no mantein quarentena obrigatório. Em relação ho apoio subsidio, Governo liu hussi Ministério relevante sira halo hela serviço ho coordenação ho ministério sira seluk hodi halo redução orçamento hussi ministério seluk, atu nune orçamento bele to hodi halo pagamento ba comunidade sira, tanba fundo ne’e rassik limitado. Informação sira seluk sei encaminha ba ministério relevante hodi tau iha consideração.
Relaciona ho agenda ba destituição no eleição ba cargo Secretário e Vice-secretário da Mesa, Presidente anúncio ba plenário katak, Mesa sei hein requerimento sira husi Deputado sira, no sei agenda fila fali iha plenária tuir mai.
Sessão plenária ne’e preside hussi Presidente Parlamento Nacional, Aniceto Longuinhos Guterres Lopes, acompanha hussi Vice-Presidente nain rua no Vice-Secretária da Mesa, Deputada Regina Freitas, ho presença Secretário de Estado para a Comunicação Social, Merício Juvenal dos Reis “Akara” no mos Comissário Comissão Anti-Corrupção, Sérgio de Jesus Fernandes da Costa Hornai ho nia equipa.
