Parlamento Nacional, liu hussi Comissão F ne’ebe trata Assunto Saúde, Segurança Social e Igualdade de Género, halo fiscalização iha Serviço Autónomo de Medicamentos e Equipamentos de Saúde (SAMES). Fiscalização ne’e lidera hussi Presidente Comissão F, Deputada Maria Gorrumali Barreto, acompanha hussi membro Comissão sira, iha loron 14 fulan abril tinan 2020.
Objetivo hussi fiscalização ne’e atu hare Armazém Nacional ne’ebe mak sai centro fornecimento Aimoruk, no mos equipamento ba médico nian relaciona ho pandemia COVID-19 nian.
Comissão F marca presença iha fatin ne’eba ho base ba informação ou notícia ne’ebe mak fo sai ba público iha loron hirak liu ba katak Avião lori equipamentos Saúde no medicamentos nian to’o ona Timor-Leste. Maibe, tuir informação hussi Funcionários SAMES sira katak to’o agora hussi SAMES rasik seidauk iha informação kona-ba equipamentos ne’ebe mak fornese hussi doadores sira.
Ho ida ne’e, Comissão F afirma katak sei kontinua servisu hamutuk ho SAMES, atu nune equipamento sira ne’e hotu tenki centraliza iha SAMES, atu nune bele distribui ba fatin ne’ebe mak precisa hanesan fatin isolamento, laboratório Nacional no Hospital sira.
Iha parte seluk, SAMES mos aproveita ocasião hodi hato’o sira nia dificuldade mak hanessan dotação dua decimal ne’e fo limitação ba SAMES, liu liu sira laiha rubrica ne’ebe mak aloka ba manutenção kareta no viagem local.
Comissão F regista Preocupação sira no mos problema ne’ebé afeta direitamente ba sira nia servisu, tamba SAMES hanesan centru distribuição aimoruk ba hospital referência nacional sira, bainhira distribuição tarde ne’e afeita ba ema nia vida no mos medico sira nia serviço.
Tuir fiscalização Comissão F nian iha SAMES hatudu katak Equipamentos ne’ebe mak atu protege médico sira wainhira halo atendimento ba iha caso COVID-19 nian komesa menus dadaun ona, hanesan roupa específicos óculos, máscaras, espera katak iha tempo badak avião sei lori equipamento sira mai to’o iha Timor.
