Pagina Inicial»Noticia
Secretária-Geral Parlamento Nacional, Cedelizia Faria dos Santos, iha loron 28 fulan fevereiro tinan 2020, participa cerimonia despedida ba formador hussi Brasil, Francisco Xavier Filho, ne’ebé mak fó formação ba funcionário sira iha DIRAT, DIRPEC no DITIC, hahú iha loron 02 fulan dezembro tinan 2019 to’o 24 fulan fevereiro tinan 2020, cerimonia ne’e realiza iha sala Conferências Parlamento Nacional.
Iha cerimonia despedida ida ne’e, Secretária-Geral Parlamento Nacional, Cedelizia Faria dos Santos hato’o agradecimento ba apoio hotu ne’ebé mak Agência Brasileira de Cooperação (ABC) ne’ebé ajuda fo formação ba funcionário sira Parlamento Nacional nian, especificamente funcionário sira DIRAT nian, iha área software livre, Linux Ubuntu, FootSwitch2 no LibreOffice.
Além de ne’e, iha intervenção Embaixador Brasil, Aldelmo Serafim Garcia Júnior, hatete, cooperação entre nação Brasil ho nação Timor-Leste estabelece iha área oioin desde independência. Parlamento Nacional estabelece cooperação ida ho Agência Brasileira de Cooperação (ABC) iha área temáticas oioin, iha ona formadores hussi Brasil ne’ebé mak fahe ona sira nia experiencia ba funcionário sira iha Parlamento Nacional, sei mai tan formadores seluk iha futuro hodi fó formação iha área sira seluk ne’ebé mak útil ba serviço parlamentar nian.
Ikus mai, formador Francisco Xavier Filho agradece ba acolhimento Parlamento Nacional nian durante estadia iha Timor-Leste, especialmente funcional DIRAT ne’ebé mak durante ne’e hamutuk ho nia, espera katak treinamento kona ba software livre, Linux Ubuntu, FootSwitch2 e LibreOffice ne’ebé mak aprende bele implemente iha serviço loroloron nian.
Iha cerimonia ne’e, entrega mos certificado ba formados hussi Divisão de Redação, Audiovisual, Transcrição e Documentação (DIRAT); Divisão de Relações Públicas, Comunicação e Educação Cívica (DIRPEC) no Divisão de Tecnologias de Informação e Comunicação (DITIC)
Participa iha cerimonia ne’e, Secretária-Geral Parlamento Nacional, Cedelizia Faria dos Santos, Embaixador Brasil iha Timor-Leste, Aldelmo Serafin Garcia Júnior, Dirigentes Secretariado Geral Parlamento Nacional no convidado sira seluk.
