Pagina Inicial»Noticia
Estudante sira hussi Escola São José Operário Balide, hamutuk na’in 37 acompanha hussi professor na’in rua, hala’o visita guiada ba Parlamento Nacional, iha loron 25 fulan fevereiro tinan 2020.
Iha abertura ba atividade ne’e, Diretor de Comunicação, Hélio Leite Magalhães, hatete objetivo hussi visita guiada ne’e atu fahe informação ba estudante sira liuliu kona-ba papel no funcionamento segundo órgão soberano nian atu nune’e sai hanessan referencia estudante sira iha futuro, Diretor ne’e mós agradece ba Escola São José Operário tanba aceita convite ne’ebé mak Parlamento Nacional haruka.
Iha fatin hanessan representante hussi Escola Secundaria Católica São José Operário Balide, Professor Saturnino Marçal Fraga, iha nia intervenção hatete parte escola agradece ba Parlamento Nacional ne’ebé bele convida estudante sira hodi participa iha visita guiada ne’e hodi bele assiste direita lala’ok serviço Parlamento Nacional nian, além de ne’e, aprende mós kona-ba papel no funcionamento segundo órgão soberano nian.
Hanessan visita guiada ne’ebé hala’o ona antes ho escola secundária sira seluk, iha atividade ne’e mós Diretor Apoio Parlamentar, Joaquim Vicente, apresenta matéria kona-ba papel no funcionamento Parlamento Nacional, nomos knaar no funcionamento Comissões Especializadas Permanentes.
Além de ne’e, estudante sira hetan oportunidade hodi halo visita guiada iha recinto Parlamento Nacional, nomos Sala Plenária Parlamento Nacional.
