Pagina Inicial»Noticia
Parlamento Nacional, liu hussi reunião Plenária ordinária iha loron 17 fulan fevereiro tinan 2020, Deputado sira hato’o preocupação kona-ba problema oioin ne’ebé comunidade sira enfrenta iha moris loroloron nian.
Antes tama ba intervenção diversas hussi Deputado sira, Distribui ba Deputado sira ofício de informação hussi Ministro de Estado e da Presidência do Conselho de Ministros e Ministro do Planeamento e Investimento Estratégico Interino kona-ba Serviço Construção Porto Tibar.
Iha intervenção diversas, Deputado sira questiona necessidade básico mak hanessan, Riin eletricidade ne’ebé halis ona, fio monu iha rai, iha área rurais balun, fio eletricidade dada no instala ona iha comunidade nia uma maibé ahi la loke ba; problema professores contratado continua la simu retro no mos sira nia salário to’o agora; Estrada foun Manleu ba Aileu condição ladún di’ak; problema veteranos relaciona ho ko’a ossan 30 dolar cada fulan; Problema Corona Virus; população sira iha Díli laran la acesso bé mós; Moru Díli laran ne’ebé nakonu ho hakerek lia fuan oioin; no mos informação importante sira seluk.
Além de ne’e, Deputado David Dias Mandati, sugere ba MESA hodi halo Voto de Pesar ba Saudoso Comandante UPM, Lino Saldanha, ne’ebé hakotu iis iha semana hirak liu ba, nune’e mos Deputada Veneranda Lemos sugere atu halo mós Voto de pesar ba Dra. Amitha Thampa, Assunto ne’e, Mesa concorda no sei realiza iha tempo bessik.
Hatán ba problema ne’ebé levanta hussi Deputado sira, Secretario de Estado para Comunicação Social hatete, Estrada foun Manleu ba Aileu, estrada ne’e baseia ba contrato ho companhia, iha contrato nia laran secção balun de’it mak tau alcatrão, Governo propõe ona iha orçamento 2020 maibé orçamento la passa; kona ba coronavírus, Governo liu hussi ministério relevante presta atenção máximo no serviço hamutuk ho Organização Saúde Mundial buka mecanismo hodi dissemina informação sira relaciona ho vírus refere; Assunto seluk ne’ebé levanta hussi Deputado sira sei encaminha nafatin ba ministério competente hodi toma atenção.
Reunião ne’e preside hussi Vice-Presidente Parlamento Nacional, Maria Angelina Lopes sarmento, acompanha hussi membro da Mesa sira, no hetan presença hussi Secretário de Estado para Comunicação Social, Merício Juvenal dos Reis.
