Pagina Inicial»Noticia
Comissão E iha Parlamento Nacional ne’ebé trata assunto Infraestruturas, hala’o fiscalização iha Município Covalima, iha loron 12 too 14 fulan fevereiro tinan 2020.
Iha fiscalização ne’e, Comissão E haree uluk instalação eletricidade iha Posto Administrativo Fohorem, Município Cova lima, liuliu iha Suco Dato Rua, ne’ebé kleur ona halo instalação maibé too agora eletricidade seidauk lakan.
Iha reunião ho Comissão E, Administrador Posto Administrativo Fohorem, Carlos Carvalho de Araujo, hatete dificuldade boot ne’ebé comunidade enfrenta mak eletricidade, bee-moos no estrada. Tinan barak ona comunidade sira enfrenta situação ne’e maibé seidauk iha resposta positiva hussi Governo.
Administrador Posto Administrativo Fohorem hatutan katak, dificuldade seluk ne’ebé comunidade sira enfrenta mak iha parte educação nian iha escola secundaria geral ida Governo decide muda ba escola técnica vocacional ne’ebé afeta estudante sira maioria muda ba município tanba menos professores, no material escola nian. Enquanto iha área saúde nian, iha Posto Administrativo refere iha de’it enfermeira ida hodi halo atendimento ba paciente sira.
Presidente Comissão E, Deputado Abel Pires da Silva, hatete objetivo fiscalização ne’e atu haree condição real infraestrutura sira nune’e bele informa ba Governo hodi buka solução. Enquanto dificuldade sira seluk kona-ba saúde no educação nian Comissão E sei coordena ho comissão relevante hodi hussu ba ministério relevante hodi responde.
Hafoin fila hussi Fohorem, Comissão E acompanha hussi Diretor Obras Publicas Município Covalima, Alberto Cardoso, continua ba haree coindicação auto estrada ne’ebé hetan estragos hussi rai-halai.
Diretor Obras Publicas Município Covalima hatete bessik ona tinan ida auto estrada refere hetan estragos maibé too agora seidauk hadi’a.
