Pagina Inicial»Noticia
Parlamento Nacional liu hussi sessão Plenária ordinária iha loron 11 fulan fevereiro tinan 2020, hala’o Voto de Pesar ba Saudoso Moisés Guimarães «Pikisy Mau», ho 54 voto a favor, 0 contra no 0 abstenções.
Saudoso Pikisy Mau moris iha loron 15 fulan maio tinan 1963 iha Município Lautém, no hakotu iis iha loron 5 fulan fevereiro tinan 2020. Hahú kedas iha tinan 1975 saudoso envolve ona iha grupo resistência iha frente armada nian too ukun-rassik-an, no continua envolve iha FALINTIL-Força Defesa Timor-Leste (F-FDTL) too hakotu iis.
Hafoin voto de pesar, continua kedas ho declaração politica hussi bancada CNRT ne’ebé ko’alia kona-ba impasse politica ne’ebé Timor-Leste enfrenta hela.
Iha intervenção diversas, Deputado sira continua sugere ba Governo oinsá controla vírus corona atu labele tama Timor-Leste, estrada ligação Díli Liquiçá no Ermera. Sorin seluk, Deputado sira mós apresenta preocupação sira oinsá bele soluciona impasse politica iha rai laran.
Sessão Plenária ne’e mós aprova Resolução Parlamento Nacional n.o 47/V (2ª) – sobre combate às alterações climáticas, ho 51 voto a favor, 0 contra no 0 abstenções.
Secretário de Estado para a Comunicação Social, Merício Juvinal dos Reis Akara, hatete Governo aprecia preocupação sira ne’e no sei informa ba ministério relevante sira hodi buka solução.
Sessão Plenária ne’e preside hussi Vice-Presidente Luis Roberto da Silva, acompanha hussi membro da Mesa sira, no hetan presença hussi O Secretário de Estado para a Comunicação Social, Merício Juvinal dos Reis Akara.
