Pagina Inicial»Noticia
Parlamento Nacional, liu hussi reunião plenária ordinária iha loron 10 fulan fevereiro tinan 2020 Deputado sira hato’o voto de congratulação ba deliberação UNESCO nian hodi estabelece loron 5 fulan maio hanessan loron mundial ba língua portuguesa, voto de congratulação ne’e aprova ho votos 50 a favor, 0 contra no 0 abstenções.
Hafoin ida-ne’e Deputado sira continua kedas ho apreciação ba relatório fiscalização hussi comissão C, ne’ebe trata assuntos finanças, ba iha município Baucau, Bobonaro no Ermera.
Nune’e mós, iha intervenção diversos, Deputado sira continua levanta questão sira mak hanessan be mós, condição estrada iha Posto Administrativo Baguia Município Baucau; comunidades sira soe lixo arbiru iha fatin público; hapara funcionários contratados tuan no halo fali contrato ba funcionários foun; preocupação kona-ba comunidades sira ne’ebé mak hakiak fahi; processo recrutamento ba administrador Manufahi ne’ebé mak seidauk hetan posse; acesso estudante sira ba iha Universidade Nacional de Timor Lorosae UNTL; Presidente Autoridade Região Administrativa ne’ebe la ba Oecússi; ko’a ossan veteranos sira nian; fatin isolamento ba moras corona; nomos oinsá mak governo atu halo gestão ba lafaek ho nune labele tata comunidade sira.
Hatán ba preocupações hussi Deputado sira nian, Secretário Estado Comunicação Social, Mericio Juvinal dos Reis Akara, hatete, kona-ba assunto estrada Baguia nian governo tau ona iha plano orçamento 2020 nian maibé orçamento la passa, kona-ba fatin isolamento iha Ataúro Governo seidauk iha plano, Governo identifica de’it fatin rua mak hanessan fatin isolamento Centro formosa no Tibar, kona-ba tomada de pose ba administrados Manufahi nian seidauk bele realiza tambá Governo sei completa documentos procedimento técnico nian, kona-ba Presidente Autoridade Especial Oecússi nian, Governo sei informa ba Presidente autoridade, nomos assunto sira seluk governo regista no sei encaminha ba Ministério relevante hodi buka solução.
Reunião plenária ne’e preside hussi Presidente Parlamento Nacional, Arão Noé de Jesus da Costa Amaral, acompanha hussi membro da Mesa, ho presença Representante do Governo, Secretário de Estado da Comunicação Social, Mericio Juvinal dos Reis Akara.
