Pagina Inicial»Noticia
Parlamento Nacional, liu hussi sessão plenária ordinária iha loron 04 fulan fevereiro tinan 2020 halo debate de urgência ho Governo kona-ba inundação ne’ebé acontece iha Díli tanba udan boot iha tempo sira ikus ne’e.
Antes tama ba debate, plenário halo uluk discussão no aprovação ba Voto de Pesar e Solidariedade ba vítima Corona virus iha Wuhan China nomos voto de pesar ba falecimento ba James Dunn hanessan eis consulado Austrália mai Timor-Leste, votos rua ne’e aprova ho unanimidade ho votos a favor 53, contra 0 no abstenções 0.
Hafoin ida-ne’e, Mesa fó oportunidade ba Governo hodi halo apresentação relaciona ho caso inundação ne’ebé mak acontece iha cidade Díli.
Governo iha nia apresentação hatete katak, causa principal rua ne’ebé mak hamossu inundação mak hanessan causa natural afeta hussi udan ne’ebé mak mai makas ho duração kleur no causa social tanba drenagem balun ne’ebé kloot, lixo ne’ebé mak nakonu iha valeta laran nomos comunidade balun halo construção uma taka be dalan. Prevenção curto prazo Governo halo mak contrata Companhia rua; ida ba halo perfuração bee no ida seluk halo limpeza drenagem sira.
Iha intervenção Deputado sira nian ligado ho problema inundação ne’e, Deputado sira questiona mecanismo prevenção ba caso sira ne’ebé mak identifica ona, hanessan população ne’ebé mak barak tebes iha Díli laran, hodi halo construção uma la tuir urbanização cidade Díli, drenagem nakonu ho lixo, drenagem balun ne’ebé mak ki’ik, politica xero plástico la iha continuidade, politica governo nian antes no depois de inundação
Hatán ba preocupação sira ne’e, Governo explica katak, Governo halo ona serviço de atendimento emergência ho equipamento ne’ebé mak iha, precisa mós estabelece regulamento ou lei balun hodi bele regula ação sira ne’ebé mak atu implementa. Em relação ho política xero plástico Governo halo ona decreto-lei no hein nia aprovação hodi bele implementa.
Sessão plenária ne’e presidi hussi Vice-Presidente Parlamento Nacional, Maria Angelina Lopes Sarmento hamutuk ho membro da Mesa sira, ho mós marca presença Ministro das Obras Públicas, Salvador Soares dos Reis Pires, Secretário de Estado de Proteção Civil, Alexandre de Araújo, Vice-Ministra da Solidariedade Social, Signi Chandrawati Verdial, Secretario de Estado do Ambiente, Demétrio de Amaral de Carvalho.
