Pagina Inicial»Noticia
Comissão G iha Parlamento Nacional ne’ebe trata assunto Educação Cultura Juventude e Cidadania, iha loron 29 to’o 31 fulan janeiro tinan 2020, hala’o fiscalização iha Região Administrativa Especial Oecússi Ambeno (RAEOA).
Objetivo hussi fiscalização refere atu rona preocupação hussi professor sira kona-ba pagamento retroativo ba professor sira nian ne’ebe Governo seidauk halo pagamento, no observa condição escola sira iha RAEOA nian.
Visita fiscalização ne’e Comissão G halo audiência ho Diretor Educação Regional RAEOA, Daniel Mauno, hodi rona informação kona-ba pagamento retroativo no informação sira seluk.
Ba assunto refere, Diretor Educação Regional RAEOA hatete pagamento ne’ebé Governo halo ba de’it tinan 2015 too 2019, hamutuk na’in 116, maibé ba tinan 2011 too 2014 seidauk halo pagamento. Educação regional contínua prepara documento hodi submete ba Ministério da Educação hodi processo pagamento.
Alem de ne’e, Comissão G mós halo audiência ho Coordenador Sindicato dos Professores RAEOA, Carlos de Fatima Almeida, ho nia equipa hodi rona preocupação sira kona-ba problema ne’ebé professor sira hassoru hodi hetan solução. Sindicato dos professores mós entrega documento balun ba Comissão hodi bele hetan resposta.
Presidente Comissão G interino, Deputado Sabino Soares ‘‘Guntur’’ hateten preocupação hirak ne’ebe professor sira apresenta sei discute iha nível comissão antes bolu ministério relevante hodi buka solução.
Hafoin audiência ho sindicato dos professores, Comissão G continua halo fiscalização ba escola Ensino Básico Central Palaban Posto Administrativo Pante Makasar, escola Infantil Reino Atoni, no escola Básica Filial Mahata, hodi haree diretamente processo aprendizagem no condição escola nian.
Atividade fiscalização ne’e lidera hussi Presidente Comissão Interino, Sabino Soares ‘‘Guntur’’ acompanha hussi membro comissão no técnico sira.
