Pagina Inicial»Noticia
Parlamento Nacional, liu hussi Sessão Plenária Ordinária, iha loron 03 fulan fevereiro tinan 2020, halo debate de urgência ho Governo kona-ba medidas ba prevenção relacionadas ho “ vírus corona”.
Sessão plenária ohin nian hahú ho execução Hino Nacional da RDTL, depois contínua ho leitura ba pedido debate urgência ne’ebé mak apresenta hussi Bancada FRETILIN, depois de leitura Bancada Proponente fundamente sira nia proposta, hafoin, Mesa entrega tempo ba Governo hodi halo apresentação.
Iha intervenção ne’e, Ministro Negócio Estrangeiro, Ministra Interina Saúde no mós Ministro da Defesa e Segurança, halo apresentação kona-ba medidas ne’ebé mak halo ona durante ne’e iha ministério sira no formas prevenção ba futuro.
Deputado sira hato’o preocupação ligado ho vírus corona ne’ebé oras ne’e sai problema mundial, mak hanessan, mecanismo transporta ema desconfia hetan moras corona; Fatin isolamento; equipamento ba prevenção; situação estudante timoroan iha Wuhan no mós serviço imigração iha fronteira sira.
Parte Governo halo explica detalhado katak, em relação ho Virus Corona ne’e, hanessan vírus foun ne’ebé mak foin deteta iha dezembro tinan 2019, no Governo ho possibilidade ne’ebé mak iha halo ona preparativos oioin ba prevenção nian hanessan colocação pessoal saúde ne’ebé competente iha área sira ne’ebé identificado hanessan entrada no saída passageiro sira, nomos prepara fatin isolamento iha Hospital Nacional Guido Valadares, Centro Saúde Bairro Formosa no mós lona ho contentor hodi coloca iha área sira identificado, no mós aquisição ba equipamento; nune’e mós parte imigração sei presta serviço hodi garantia cidadão hotu iha fronteiras, Porto no mós Aeroporto. Ligado ho estudante timoroan iha Wuhan-China, sira halo ona teste no la identifica sintomas ruma ba vírus ida ne’e, mesmo nune’e, Governo buka nafatin meios atu transporta sira hussi fatin ne’ebá.
Ikus liu, Plenário decide hodi fó voto de solidariedade ba nação China ne’ebé mak afeta ba Virus Corona, no discussão ne’e sei halo iha loron terça-feira, 04 de fevereiro de 2020.
Sessão plenária ne’e, preside hussi Presidente Parlamento Nacional, Arão Noé de Jesus da Costa Amaral, acompanha hussi membro da Mesa no mós marca presença, Ministro dos Negócios Estrangeiros e Cooperação, Dionísio da Costa Babo Soares, Ministro da Defesa e Segurança, Filomeno da Paixão de Jesus no Ministra Interina Saúde, Élia António de Araújo dos Reis Amaral.
