Pagina Inicial»Noticia
Presidente do Parlamento Nacional, Arão Noé de Jesus da Costa Amaral, acompanha hussi membro da Mesa sira halo reunião ho equipa Task Force Veteranos ba Assunto Interesse Nacional, iha loron 29 fulan janeiro tinan 2020, iha Sala de Conferência Parlamento Nacional.
Reunião ne’e ho objetivo atu rona preocupação sira hussi equipa Task Force Veteranos ba Assunto Interesse Nacional kona-ba Eis edifício DPRD iha Kaikoli Díli, ne’ebé antes ne’e Comandante Em Chefe das FALINTIL, Kay Rala Xanana Gusmão, haruka ona carta oficial ba Governo liu hussi Ministério da Justiça hodi entrega edifício refere ba Veterano sira hodi usa hanessan Cede ba Veterano sira, maibé horas ne’e daudaun Governo decide hodi halo fali construção ba edifício Tribunal Supremo nian.
Porta-voz ba equipa Task Force Veteranos, Jorge Alves, hatete durante ne’e equipa Task Force halo ona esforço barak hodi hassoru malu ho entidade relevante sira hodi soluciona polemica refere, tanba durante ne’e veterano sira la iha cede ka edifício próprio ida.
Presidente do Parlamento Nacional, simu preocupação sira ne’e no hussu atu halo mós carta oficial ida nune’e Parlamento Nacional bele haruka ba Governo hodi soluciona polémica ne’e.
Presidente do Parlamento Nacional mós reconhece katak precisa tebes edifício ida próprio ba veterano sira hodi bele tulun Governo ka instituição relevante sira hodi soluciona preocupação hirak ne’ebé liga ba veterano sira.
