Pagina Inicial»Noticia
Secretária-Geral do Parlamento Nacional, Cedelizia Faria dos Santos, acompanha hussi Secretário-Geral Adjunto, Luis Nascimento da Costa, halo reunião ho funcionário sira hussi Direção Gestão Financeira, iha loron 27 fulan janeiro tinan 2020, iha sala conferência Parlamento Nacional.
Iha introdução, Secretária-Geral hateten objetivo hussi reunião ho Chefe Divisão, funcionário sira iha Direção de Gestão Financeira ne’e atu identifica dificuldade no desafio hirak ne’ebe mak funcionário sira enfrenta, nune bele buka solução no melhoria serviço secretariado nian iha futuro.
Durante reunião ho Secretária-Geral, chefe divisão sira ne’ebe mak tutela iha Direção Gestão Financeira hanessan Divisão de Finanças, Divisão de Aprovisionamento no Divisão de Logística Património e Serviço Gerais, apresenta progresso no dificuldade divisão nian durante ne’e.
Além de ne’e, funcionário sira mós apresenta preocupação sira liga ba serviço tuir tarefa ida idak nian oinsá acelera no fó atendimento di’ak liu tan.
Tuir plano, reunião ho Direção de Gestão Financeira sei hala’o cada fulan haat hodi acompanha bessik liu tan progresso serviço direção nian.
Reunião ne’e hanessan reunião dahuluk no sei continua ho Direção no Gabinete sira seluk iha estrutura secretariado nian iha tempo badak.
