Pagina Inicial»Noticia
Parlamento Nacional, liu hussi sessão plenária ordinária, iha loron 27 de janeiro de 2020, questiona maka’as ba moras Vírus Corona ne’ebé mak oras ne’e daudaun sai preocupação makas iha mundo, tanba moras ida ne’e, tuir informação media social nian katak nação vizinho balun afetado ona moras refere, ho nune’e, iha intervenção Deputado sira nian, Deputado sira hussu Governo atu toma medidas urgência ruma, hodi controla Aeroporto, fronteira terrestre no mós porto Díli. Relaciona ho assunto ida ne’e, Bancada FRETILIN iha nia declaração politica hato’o requerimento ho carater urgência ba Governo atu ministério competente halo debate urgência ho Parlamento Nacional hodi buka solução ba problema refere.
Além de ne’e, problema seluk ne’ebé mak Deputado sira levanta iha intervenção diversas mak hanessan; Inundação iha Díli laran; Serviço segurança hodi previne crime sira ne’ebé mossu atu labele mossu tan; Situação paciente iha HNGV ne’ebé toba de’it iha rai; Lixo iha Díli laran ne’ebé desorganizado; reabilitação estrada iha Baucau uja cimente; funcionário balun seidauk simu salário no mós balun seidauk simu retroativo; ko’a 30 dolar hussi salario veterano sira; utilização linguagem iha media social ne’ebe la educativo; tinta passadeira precisa pinta foun; Torre eletricidade iha Akanunu precisa atende ho urgência.
Relaciona ho problema sira ne’ebé mak Deputado sira levanta, Ministro da Reforma Legislativa e Assuntos Parlamentares, Fidelis Leite Magalhães, hatete; Ministério Obras Públicas oras ne’e daudaun organiza hela Maquina hodi haluan drenagem sira, alem de ne’e, ministério mós contrato hela companhia balun hodi bele assegura serviço emergência sira ne’e; Assunto sira seluk, sei hato’o ba ministério relevante hodi bele resolve.
Antes atu termina, Presidente anuncia katak requerimento ho carater urgência ne’ebé hato’o hussi Bancada Fretilin, Mesa sei formaliza ba Governo, no iha semana ida ne’e nia laran sei realiza debate ho Governo relaciona ho assunto ne’ebé mak menciona.
Iha sessão plenária loron ohin, plenário halo aprovação ba voto de solidariedade ba vitimas incêndios florestais iha Austrália ho votos por unanimidade, 52 a favor, 0 contra no 0 abstenções.
Sessão Plenária ne’e preside hussi Presidente do Parlamento Nacional, Arão Noé de Jesus da Costa Amaral, acompanha hussi membro da Mesa sira no hetan presença hussi Ministro da Reforma Legislativa e Assuntos Parlamentares, Fidélis Manuel Leite Magalhães.
