Pagina Inicial»Noticia
Parlamento Nacional liu hussi Sessão Plenária Extraordinária iha loron 16 fulan dezembro tinan 2020, continua halo discussão iha generalidade ba Proposta de Lei nº 9/V(2ª)-Orçamento Geral do Estado 2020 nian.
Discussão ne’e hahú iha 09h30 ne’ebé loke diretamente hussi Presidente Parlamento Nacional, Arão Noé de Jesus da Costa Amaral, acompanha hussi membro Mesa sira ho presença Primeiro-Ministro da República Democrática de Timor-Leste, Taur Matan Ruak, hamutuk ho membro Governo sira.
Discussão ne’e hahú ho ponto de ordem hussi Deputado balun relaciona ho intervenção Deputado balun iha debate loron dahuluk ne’ebé hamossu desentendimento ba interpretação linguagem bainhira hato’o pergunta ba Governo.
Hafoin ida-ne’e, Presidente do Parlamento Nacional fó tempo ba Deputado sira hodi halo intervenção relaciona ho Proposta OGE ba 2020. Iha intervenção ne’e Deputado sira questiona execução orçamento iha área necessidade básica nian hanessan saúde e educação bee-moos, agricultura ne’ebé la hatudu qualidade.
Além de ne’e, Deputado sira questiona kona-ba ministério balun ne’ebé seidauk iha nia ministro maibé execução orçamento máximo liu, no membro Governo balun ne’ebé la marca presença iha audiência publica ho Deputado sira inclui Proposta OGE 2020 ne’ebé la tau prioridade iha área importante sira.
Preocupação hirak ne’e, hetan kedas resposta hussi Primeiro-Ministro katak iha programa hirak ne’e define ona área prioridade sira, maibé sorin seluk Governo mós depende ba recurso ne’ebé mak iha. No desenvolvimento ne’e rassik la’o cada tinan ho nia necessidade.
Iha parte loraik, Deputado sira continua apresenta preocupação sira liga ba plano no programa Governo nian compara ho orçamento ne’ebé prevê iha tinan ida-ne’e. Nune’e mós politica estimação despesas no receitas.
Hatán ba preocupação hirak ne’e, Primeiro-Ministro hatete preocupação barak Deputado sira-nian sei hetan resposta iha discussão especialidade, nune’e ministro sira bele explica detalho ba preocupação hirak ne’e.
Discussão loron daruak ne’e termina iha 17h50 no sei continua iha loron 17 fulan janeiro tinan 2020, hodi halo aprovação iha generalidade.
