Pagina Inicial»Noticia
Parlamento Nacional liu hussi reunião Plenária ordinária iha loron 16 fulan dezembro tinan 2019, baixa ona Projeto de Resolução no 49/V/(2ª) - Orçamento Retificativo do Parlamento Nacional ba tinan 2020 nian ba Comissão C ne’ebé trata assunto Finanças Publicas, hodi discute no prepara relatório no parecer antes aprova iha Plenária.
Iha sessão Plenária ne’e mós, Deputado sira halo eleição ba membro sira Conselho Superior da Defensória Publica, hanessan Dr. Fernando Lopes de Carvalho, (membro efetivo); no Dr. Manuel Sarmento, (membro suplente), ho 37 votos a favor, 17 contra no 1abstençao, ho nia mandato tinan 4.
Iha Período Antes de Ordem do Dia nian, Deputado sira halo apreciação ba relatório fiscalização urgência hussi Comissão F ne’ebe trata assunto Saúde, Segurança Social e Igualdade de Género, iha Município Aileu, Ermera, Liquiçá, no Maliana, ba vitima sira incendio iha fulan hirak liu ba.
Durante discussão ba relatório fiscalização, Deputado sira hussu ba Governo atu apoio lalais vitima sira tanba agora daudaun tempo udan, atu sira bele harii hikas sira nia uma. Além de ne’e hussu ba Governo atu cria equipa Taks Force ida hodi haree ba assunto desastre naturais nian.
Entretanto iha intervenções diversas, Deputado sira contínua preocupa ba dificuldade hirak ne’ebé afeta ba comunidade sira, hanessan eletricidade, bee moos, inclui assunto importante sira seluk.
Sorin seluk, bancada parlamentar KHUNTO, liu hussi Deputado Antonio Verdial de Sousa, hato’o declaração política relaciona ho segurança alimentar iha Timor-Leste.
Hatán ba preocupação sira ne’e, Secretário de Estado para a Comunicação Social, Mericio Juvenal dos Reis «Akara» hateten Governo fó ona apoio ba vitima sira incendio iha município hirak ne’ebé Deputado sira deteta, no ba oin Governo contínua esforço hodi cria condição di’ak ba vitima sira.
Kona-ba assunto sira seluk, Governante ne’e hatete, Governo liu hussi linha ministério sira continua esforço hodi resolve problema hirak ne’ebé povo enfrenta.
Reunião Plenária ne’e preside hussi Presidente do Parlamento Nacional, Arão Noé de Jesus da Costa Amaral, acompanha hussi membro da Mesa sira no hetan presença hussi Secretário de Estado para a Comunicação Social, Mericio Juvenal dos Reis «Akara».
