Pagina Inicial»Noticia
Presidente do Parlamento Nacional, Arão Noé de Jesus da Costa Amaral, acompanha hussi Vice-Presidente Parlamento Nacional, Maria Angelina Lopes Sarmento, Presidente Comissão F, Maria Barreto ho Membro sira, halo reunião ho Organização Ex-resistência Frente Clandestina nian, iha loron 11 fulan dezembro tinan 2019, iha Sala Conferência Parlamento Nacional.
Objetivo hussi encontro ne’e, representante Ex-resistência Frente Clandestina hato’o sira nia lamentação ba Parlamento Nacional kona-ba publicação resultado verificação dados veteranos nian ne’ebé publica ona iha território Timor Laran tomak hussi comissão homenagem.
Iha reunião ne’e, representante Ex-resistência sira questiona kona-ba questões técnicas hanessan maneira entrevista hussi comissão homenagem nian ba veteranos sira, dala barak sira julga uluk ema katak veteranos falso no Organização ida-ne’e la existe no la hola parte iha resistência, no perguntas sira ne’ebé mak sira hussu ne’e la ajuda veteranos sira atu halo declara. Ida-ne’e cria dalan ba veteranos sira hodi senti descontente ba sira nia luta durante funu, ida-ne’e mós bele cria instabilidade ba unidade nacional nian.
Representante ex-resistência sira reforça tan katak sira iha dados completo ba acto sira ne’ebe mak pessoal sira pratica iha Município sira.
Ho nune’e, representante Ex-resistência sira ne’e hussu ba Presidente Parlamento Nacional ho Presidente Comissão F atu convida Secretario Estado ba Assuntos Veteranos hodi mai iha Parlamento Nacional atu explica método verificação dados veteranos nian tanba verificação iha Município ida la hanessan ho Município sira seluk.
Ikus mai Presidente Parlamento Nacional agradece ba Ex-resistência sira tanba hato’o ona informação ne’ebé importante ba Parlamento Nacional hodi nune’e estado bele buka solução.
