Pagina Inicial»Noticia
Parlamento Nacional, liu hussi Sessão Solene de homenagem, iha loron 27 fulan novembro tinan 2019, halo cerimónia hodi hato’o homenagem ikus ba saudoso Deputado V Legislatura, Gilman Assunção Exposto dos Santos, ne’ebé hakotu-iis iha Hospital Nacional Guido Valadares (HNGV), iha loron 25 fulan novembro tinan 2019.
Homenagem ikus ne’e hato’o liu hussi sessão plenária extraordinária, ne’ebé aprova voto de pesar ho 56 votos a favor, 0 contra no 0 abstenções.
Saudoso Deputado Gilman Assunção Exposto dos Santos, hanessan Deputado atual ba V Legislatura 2018-2023, hussi Bancada UDT/FM, matebian moris iha Fatubessi-Ermera, loron 04 fulan julho tinan 1956 no hakotu-iis ho idade 63 anos.
Iha sessão de homenagem ne’e, hahú ho toca Hino Nacional no mós um minuto de silêncio ne’ebé dirigi hussi Presidente Parlamento Nacional, além de ne’e, iha mós leitura ba votos de pesar ne’ebé Parlamento aprova ona no mós leitura ba voto condolência hussi Primeiro-Ministro da República Democrática de Timor-Leste, Taur Matan Ruak.
Iha homenagem ne’e, Bancada sira iha Parlamento Nacional, hato’o sira nia sentidas condolências ba família Saudoso Deputado no sei la haluha ninia contribuição durante período resistência e, depois da independência, no contribuição ba desenvolvimento nação ida-ne’e.
Presidente do Parlamento Nacional, Arão Noé de Jesus da Costa Amaral, hodi Parlamento Nacional nia naran, hato’o sentidas profundas condolências ba família saudoso deputado nian, no mos ba família boot Partido UDT ne’ebé lakon ema di’ak no líder partido nian.
Depois sessão homenagem iha Parlamento Nacional, sei iha celebração Missa Requiem nian iha Igreja Motael, hafoin ida ne’e, cerimónia fúnebre iha cemitério Becussi, Díli.
