Pagina Inicial»Noticia
Comissão F iha Parlamento Nacional ne’ebé trata assunto Educação, Saúde, Segurança Social e Igualdade de Género, halo fiscalização urgente ba Município Liquiçá, Maliana, Ermera no Aileu hodi haree diretamente acontecimento incendio iha município refere.
Atividade fiscalização ne’ebé hala’o iha loron 16 too 18 fulan outubro tinan 2019 ne’e fahe ba grupo rua; grupo ida lidera direta hussi Presidente Comissão F, Deputada Maria Gorumali Barreto, no grupo seluk lidera hussi Vice-Presidente Comissão F, Deputado Noé da Silva Ximenes «Buka Tuir».
Fiscalização refere hala’o baseia mós reunião líder bancada sira no hetan orientação hussi Presidente do Parlamento Nacional hodi bele recolha dados hussi vitima desastre naturais ne’e.
Hussi fiscalização refere comissão identifica uma kain 490 mak hetan estragos no ahi-han, hanessan iha Município Liquiçá, Suco Asmanu, Aldeia Siskoe Lema hamutuk uma kain 57; Município Maliana Posto Administrativo Cailaco, Suco Manapa, Aldeia Tatiluri, uma kain hamutuk 9, Município Ermera, Posto Administrativo Atsabe hamutuk uma kain 126, Posto Administrativo Hatulia hamutuk uma kain 221, Município Aileu hamutuk uma kain 77. Hussi total uma kain hirak ne’e balun hetan ona tulun emergência hussi Governo no balun seidauk hetan.
Presidente Comissão F hussu Governo atu resolve lalais situação ne’e tanba maioria hussi vitima seidauk hetan tulun ruma, no liuliu tempo udan bessik daudauk hodi afeta ba comunidade sira-nia hela fatin.
