Pagina Inicial»Noticia
Presidente do Parlamento Nacional, Arão Noé de Jesus da Costa Amaral, acompanha ho nia Vice-Presidente, Deputado Luís Roberto da Silva no Secretária da Mesa, Deputada Maria Terezinha Viegas, ho Deputado sira halo reunião ho Vice-Presidente Parlamento Indonésia, Fadli Zon, ho nia comitiva, iha loron 13 fulan setembro tinan 2019, iha sala Conferência Parlamento Nacional nian.
Reunião ne’e ho objetivo atu hametin cooperação entre Parlamento Nacional Timor-Leste no Parlamento Indonésia inclui povo rai rua nian.
Presidente do Parlamento Nacional hatete relação bilateral entre Timor-Leste ho indonésia tama iha fase foun ne’ebé produtivo no construtivo. Parlamento Nacional apoio makas relação no cooperação Governo Timor-Leste ho Governo Indonésia, iha aspeto educação, saúde infraestrutura, combate corrupção, defesa no segurança, diplomacia parlamentar inclui assunto sira seluk.
Parlamento Nacional agradece ba apoio indireta hussi Indonésia ba solução fronteira marítima entre Timor-Leste ho Austrália, no agradece mós ba Governo Indonésia nia concordância hodi resolve fronteira terrestre no marítima entre Timor-Leste ho Indonésia.
Entretanto Vice-Presidente Parlamento Indonésia, Fadli zon, agradece ba Estado Timor-Leste tanba ne’ebé tau ona naran 3ª Presidente Indonésia nian, BJ Habibie, iha ponte foun ne’ebé foin inaugura, hanessan honra ida hodi hametin relação bilateral entre nação rua iha setor sira hanessan comercio, saúde, educação no seluk tan.
Vice-Presidente Parlamento Indonésia mós sugere ba Estado Timor-Leste atu acelera visa livre ba cidadão Indonésia nune bele facilita cidadão Indonésia mai iha Timor-Leste, tanba Governo Indonésia implementa ona visa livre ba cidadão Timor-Leste.
Hafoin reunião parte rua entrega prenda ba malu hanessan símbolo recordação no amizade entre rai rua.
