Parlamento Nacional liu hussi Sessão Solene iha loron 9 fulan setembro tinan 2019, fó ultimo homenagem ba Saudoso Lucas da Costa «Rama Metan» liu hussi Voto nº 21/2019, ho 19 votos a favor, 0 contra no 0 abstenções.
Saudoso Lucas da Costa, moris Atsabe Município Ermera, iha loron 11 fulan janeiro tinan 1952, hanessan mós membro Parlamento Nacional iha 2º Legislatura hussi Bancada Partido Democrático. Durante resistência, Saudoso envolve iha organização oioin, no hanessan mós fundador ida ba Organização Resistência RENETIL hodi contribui ba luta libertação nacional.
Alem de ne’e, Saudoso ho nia maluk sira seluk sai fundador ba Universidade da Paz (UNPAZ), no sai Reitor UNPAZ too hakotu iis iha loron 5 fulan setembro tinan 2019.
Iha sessão homenagem ne’e Presidente do Parlamento Nacional, Arão Noé de Jesus da Costa Amaral, lori naran Parlamento Nacional hato’o sentido condolência ba kaben no família matebian saudoso Lucas da Costa «Rama Metan» no fó uluk tempo ba Secretaria da Mesa, Deputada Maria Terezinha Viegas, hodi lê biografia saudoso nian.
Hafoin leitura ba biografia saudoso nian, contínua kedas ho intervenção hussi representante sira bancada parlamentar nian hodi expressa sentido condolência ba saudoso.
