Pagina Inicial»Noticia
Secretariado-Geral do Parlamento Nacional liu hussi Divisão Relações Públicas Comunicação e Educação Cívica, realiza seminário iha Município Manufahi durante loron rua hahú iha loron 7 too 8 fulan agosto tinan 2019.
Seminário ho tópico «Hakbessik Parlamento Nacional Timor-Leste ba Comunidade Município Manufahi, Natureza no Funcionamento Órgão Soberania Estado ne’e», realiza iha salão administração município ho orador sira hanessan; Luís Nascimento D.J.A. da Costa (Secretário Geral Adjunto do Parlamento Nacional) apresenta matéria kona-ba Processo Orçamento Geral do Estado; Jimmy Betulau (Analista Legal do Parlamento Nacional) apresenta matéria kona-ba Constituição RDTL; Joaquim Vicente (Diretor de Apoio Parlamentar) apresenta matéria kona-ba Parlamento Nacional nu’udar Órgão de Soberania de Timor-Leste, Funcionamento das Comissões Especializadas Permanentes, no Processo Legislativo Comum; no Hélio Leite Magalhães (Diretor de Comunicação) apresenta matéria kona-ba Oinsá Publico ka Comunidade bele acesso ba Parlamento Nacional.
Secretario Geral Adjunto, Luís Nascimento D.J.A. da Costa, iha abertura ba seminário ne’e hatete, importante tebes ba comunidade sira liuliu estudante sira hatene lala’ok no funcionamento Parlamento Nacional, no oinsá representante povo iha Parlamento Nacional bele hala’ó-nia knaar tuir competência Parlamento Nacional ne’ebé regula ona iha Constituição RDTL.
Iha fatin hanessan, Administrador Município Manufahi, Arantes Sarmento, agradece ba Secretariado Geral Parlamento Nacional ne’ebé partilha ona informação sira kona-ba Parlamento Nacional, nune’e comunidade sira, autoridade local, liuliu estudante sira bele entende no conhece di’ak liu tan serviço segundo órgão soberano ida-ne’e.
Agradecimento hanessan mós hato’o hussi Diretor da Educação Municipal, Trinito Sarmento, katak estudante sira precisa tebes conhece saida mak Parlamento Nacional liuliu serviço Deputado sira-nian.
Durante apresentação ba matéria sira ne’e, iha mós sessão pergunta hussi estudante no autoridade local sira liga ba serviço parlamentar nian. No sessão ne’e rassik encera hussi Diretor de Apoio Parlamentar, Joaquim Vicente.
