129.ª Assembleia União Interparlamentar (UIP) nian
Assembleia União Interparlamentar nian ba dala 129 hala’o iha Genebra iha 7 to’o 9 outubro 2013. Deputados David “Mandati” Ximenes (Presidente), Duarte Nunes (Vice-Presidente), Brígida Correia (secretária) e Izilda Soares hola parte iha Assembleia ne’e. Secretário-Geral do Parlamento Nacional mós bá hotu iha comitiva no participa iha reunião husi Secretário-Geral sira UIP nian.
Delegação participa iha trabalhos plenária nian, ne’ebé hala’o discussão kona-ba ponto de emergência, ne’ebé Dinamarca, Finlândia, Islândia, Noruega no Suécia apresenta, kona-ba parlamento sira-nia papel iha fiscalização ba uso no destruição armas químicas nian. Delegação mós hola parte iha comissão sira tuir mai ne’e:
Comissão Dahuluk (Paz e segurança internacional), ne’ebé ko’alia kona-ba Proposta Resolução kona-ba “La’o ba oin atu iha mundo livre husi armas nucleares: parlamento sira-nia contribuição". Relator sira iniciativa legislativa ne’e nian maka Sr. Blaine Calkins (Deputado husi Canadá) no Sra. Yolanda Ferrer Gomez (Deputada husi Cuba). Comissão Daruak (Desenvolvimento Sustentável, Comércio e Finanças), ne’ebé discute Proposta Resolução kona-ba “Desenvolvimento ne’ebé Resiste Risco: hola iha consideração tendência demográfica no constrangimento natural sira” ne’ebé relator sira apresenta: Sr. Saber Hossain Chowdhury (Deputado husi Bangladesh) no Sr. Philippe Mahoux (Deputado husi Bélgica). Comissão Datoluk (Democracia e direitos humanos), ne’ebé discute Proposta Resolução kona-ba "Papel parlamento sira-nian iha defesa ba labarik sira-nia direito, liuliu labarik migrante sira ne’ebé la iha ema acompanha, no mós atu previne sira-nia exploração iha situação funu no conflito”, ne’ebé relator sira maka Sra. Gabriela Cuevas (Deputada husi México) no Sra. Jameela Nasaif (Deputada husi Bahrain). Comissão UIP nian ba Assunto sira kona-ba Nações Unidas, ne’ebé ko’alia kona-ba intensifica relação entre Nações Unidas no parlamento nacional sira, ne’ebé mós objetivo boot ida UIP nian. Iha reunião sira Comissão ne’e nian mós debate implicações husi Tratado kona-ba Comércio Armas nian (TCA, ATT iha sigla ho lian inglês), ne’ebé Assembleia-geral das Nações Unidas adota iha 2 abril iha tinan ne’e. Discute mós, ho participação husi delegação parlamentar Timor-Leste nian, implementação ba Resolução 1540 husi Conselho de Segurança Nações Unidas nian no não-proliferação ba Armas destruição maciça nian.
