Iha 12 dezembro, depois de aprovação dahuluk husi Presidente e Secretário-geral do Parlamento Nacional, Grupo Trabalho foun, ne’ebé mosu atu continua serbisu Conceção e Construção ba portal eletrónico foun Parlamento Nacional nian, ne’ebé uluk hahú iha 2010, foin apresenta protótipo portal foun nian ba Mesa do Parlamento no ba Líder Bancada Parlamentar sira-nian, ho objetivo atu simu sugestão oioin husi órgão ne’e nia liderança.
Grupo trabalho ne’e inclui membro sira tuir mai ne’e: Adelino Afonso de Jesus, Diretor de Apoio Parlamentar, ne’ebé coordena, Guilhermina Barbosa, Chefe da Divisão de Relações Públicas, Comunicação e Educação Cívica, Abílio Caldas ho Horácio Abílio, respetivamente Chefe e técnico iha Divisão de Tecnologias de Informação e Comunicação, Alessandra Ronchi, Assessora ba Relações Públicas e Comunicação, Nuno França, Especialista kona-ba Tecnologias Informação e Comunicação nian, João Paulo Esperança, professor lian tetun nian, José Carlos Adão ho Elsa Miranda, rua hotu professor lian português nian.
Grupo trabalho nia knaar principal atu apresenta proposta completa ida ba portal eletrónico foun Parlamento Nacional nian, inclui aspeto hotu-hotu ne’ebé precisa ba funcionamento di’ak, nomeadamente web design, funcionalidade no solução tecnológica sira. Portal eletrónico foun ne’e nu’udar objetivo prioritário ida iha estratégia comunicação e informação nian husi Parlamento Nacional.
