Membru sira hussi Congresso dos Estados Unidos da América reuni ho Parlamento Nacional
Membru sira hussi Congresso dos Estados Unidos da América hala’o enkontru ho Presidente Parlamento Nacional no Xefe Bankada sira iha loron 14 fulan agosto tinan 2015 iha sala konferensia Parlamento Nacional.
Delegasaun hussi Congresso dos Estados Unidos da América ne’e xefia hussi Presidente da Parceria da Casa da Democracia Vern Buchanan, no hussi Parlamento Nacional Timor Leste xefia hussi Presidente Parlamento Nacional Vicente da Silva Guterres, Vice-Presidente Adérito Hugo da Costa, Sekretária Meza Angelina Machado de Jesus, Prezidente Bankada CNRT Deputado Natalino dos Santos Nascimento, Vise-Prezidente Bankada FRETILIN Deputado Francisco Miranda Branco, Prezidente Bankada PD Maria L. M. de Sousa Bessa, Vise-Prezidente Bankada Frenti-Mudansa Jorge da Conceição Teme.
Antes hahú reuniaun Prezidente Parlamento Nacional hato’o liafuan bem-vindo ba delegasaun hussi Congresso dos Estados Unidos América nian, no introduz situasaun no lala’ok politika no dezenvolvimentu Timor-Leste nian durante ne’e.
Presidente Parlamento Nacional hatete sistema demokrasia ne’ebé nasaun foun ne’e implementa diferente no uniku iha mundo, ne’ebé dala barak la entende di’ak hussi lideransa no nasaun sira ne’ebé adopta demokrasia tuan.
«Ezemplu ida ba Ita-Boot sira, ami-nia Primeiru Ministro Xanana Gusmão entrega kargu Primeiro Ministro ba ema importante ida hussi partidu opozisaun FRETILIN nian, ne’e hatudu situasaun especial iha mundo» dehan Presidente Parlamento Nacional.
Nia dehan tan conjuntura politika ne’ebé durante ne’e la’o iha Timor Leste hetan konsensu hussi partido politiku sira ho objetivu atu halo dezenvolvimento ne’ebé sustentável no equilibrado ba povo tomak. Iniciativa hirak ne’e hahú hussi lideransa jerasaun tuan sira no kontinua ba jerasaun foun sira hodi hala’o dezenvolvimento nasional tuir planu estratejiku ne’ebé define ona.
Entretantu xefe delegasaun hussi Congresso dos Estados Unidos América Vern Buchanan mós hatete Estados Unidos América rassik iha ona mudansa politika barak liuliu iha prosesu no lala’ok demokrasia nian.
Tanba agora daudaun iha Congresso dos Estados Unidos América hamossu aseitasaun no konkordansia barak hussi diferensa ideia sira hussi partido politiko.
«Ami mós iha ona mudansa barak iha área politika, demokrasia, oinsá aseita diferensa ideia sira ne'ebé mossu entre partido politiku sira» dehan Vern Buchanan.
Nia dehan Timor-Leste ho Estados Unidos América presiza iha koperasaun di’ak no kontinua ba oin atu dezenvolve nasaun foun ne’e.
Iha biban ne’e mós xefe delegasaun ne’e fó oportunidade ba nia membru sira hodi hussu situasaun politika no lalaok dezenvolvimento liuliu oinsá responsabilidade nudar representante povo no ba eleitor ne’ebé fó konfiansa ba Parlamento Nacional, hodi bele sai mós hanessan referensia ida ba Estados Unidos América hodi estuda no halo tuir iha futuru oin mai.
Entretantu iha ninia liafuan ikus, Prezidente Parlamento Nacional Vicente da Silva Guterres fó hanoin ba delegasaun ne’e atu ajuda Timor-Leste hodi rezolve problema fronteira tasi nian, tanba entre Austrália ho Estados Unidos América iha relasaun ne’ebé metin no Timor-Leste rassik konsidera sira ne’e nu’udar nia amigo di’ak.
«Povo timor hakarak iha ninia direitu rassik tuir tratado internacional, lakohi involve an iha ema nian, ne’eduni hussu atu ita hotu respeita regra internacional sira kona-ba tasi ninian» afirma Presidente Parlamento Nacional.
Antes ensera reuniaun ne’e, Presidente Parlamentu Nasional entrega lembrança ida ba xefe delegasaun inklui tara tais nu’udar símbolo unidade no agradesimentu.
