Iha loron 13 – 14 Fevereiru 2014, Forum Parlamentares Ázia ba Populasaun no Dezenvolvimentu (FPAPD – Asia Forum of Parliamentarians on Population and Development) hamutuk ho UN Women Rejionál ba Ázia-Pasífiku organiza Enkontru Preparatori ba Kampiaun Parlamentar ba sesaun 47 Komisaun kona-ba Populasaun no Dezenvolvimentu (KPD - Commission on Population and Development) inklui Konsultasaun kona-ba Estratégia no Boa Pratika ba Eliminasaun Violénsia Kontra Feto iha Nivel Nasionál iha Chiang Mai, Thailandia.

Objektivu husi workshop neʼe: atu hakbiit Membru Parlamentares (MP) sira nia koñesimentu no kompriensaun kona-ba prosesu revizaun global ba asuntus eliminasaun violénsia kontra feto no Membru Parlamentares bele dezenvolve deklarasaun atu aprezenta iha Konferénsia kona-ba Beijing +20. Partisipantes sira hamutuk ema nain 24 (feto nain 7 no mane nain 17) husi Bangladesh, Bhutan, Cambodia, Malásia, Myanmar, Nepal, Philippinas, Thailand, no Timor-Leste nuneʼe mos UNFPA APRO no AFPPD.

Tema prinsipál sira ba enkontru neʼebá mak hanesan: ambiente, planeamentu familiár, fertilidade, mortalidade, HIV/SIDA, migrasaun Internasionál, kasamentu no uniaun, MDGs, polítika populasaun, tendensia populasionais no urbanizasaun. Membru Parlamentar sira neʼebé partisipa iha enkontru neʼe hamutuk asina deklarasaun ida atu lee iha sesaun dala 47 CIPD nian.

Konteúdu husi deklarasaun neʼe inklui: 1) MP sira nia rekoñesimentu kona-ba kresimentu iha disponibilidade de prestasaun servisu ba apoiu saúde no seksuál reprodutiva inklui planeamentu familiár, hadia saúde maternal no promove igualdade jéneru; 2) ezisténsia dezafiu sira hanesan: asesu ba servisu saúde seksuál no reprodutiva kontinua iha dezigualde ho feto, adolesentes no foin-saé, no mos ema vulneravel sira seluk; mortalidade inan no infantil neʼebé kontinua aʼas, HIV/SIDA no selu-seluk tan. 3) MP sira nia kompromisu atu: rezolve problema ho pertinensia hapara violénsia bazeada ba jéneru, inklui lei, regulamentu, polítika no pratika sira neʼebe diskrimina feto labarik feto; aprova lejislasaun apropriadu, hare fila-fali lejislasaun neʼebé iha ona no mobiliza apoiu lei neʼebé forte atu iha konsistente no kompatível ho CIPD atu bele iha rezultadus neʼebé ekitativu, sustentavel ba saúde, sosiedade no ekonomia. MP sira mos promete atu promove abordajen boa governasaun bazeada ba direitus humanus ba avansamentu ajenda CIPD nian.

MP sira mos deklara atu proteje povu nia bem-estar, no insisti nasaun Estadu Membru no komunidade internasionál atu reafirma sira nia komitmentu ba CIPD no implementasaun asaun xave sira no konsidera enkuadramentu ba asaun atu monitoriza Programa Asaun CIPD, espesifiku ba kestaun direitu ba saúde seksuál no reprodutiva, igualdade jéneru, foin-saé sira, ferik no katuas, urbanizasaun no dezenvolvimentu neʼebé sustentavel. MP sira mos promete atu insisti Estadu Membru atu rezolve inigualdade neʼebé makaʼas tebes. Nudar MP husi Ásia-Pasifíku, sira mos kompromete atu hakotu inigualdadi no promove povu nia bem-estar iha rejiaun.